UMBUTHO wooNoteksi, kuquka norhulumente, balumkise uluntu ukuba luzikhwebule ekoyamanisaneni obesakuba nguCeba weANC eNelson Mandela Bay, uAndile Lungisa, kwakunye nokudutyulwa kubulawe uNoteksi eGqeberha ngoLwesine.
UDiki Zamani, ongusihlalo kumbutho Uncedo Service Taxi Association eNjoli, udutyulwe lahlanza iselwa ngamadoda angaziwayo KwaZakhele.
Kumboniso othe ndi kumakhasi onxibelelwano, uZamani uvela ephendula ifowuni, ze emva koko ayongena emotweni yakhe. Xa eqala nje ukungena, kuphuma ndoda ithile kwiMercedes-Benz sele ibaleka, iphethe ingadlangadla yompu.
Le ndoda ivele yadubula ijikeleza imoto enoZamani ukusuka kwifestile esenxele ukuya ngaphambili de yaya kwifestile enomqhubi. Emva koko le ndoda ibonwa ivula ucango, iqhubeka nokudubula.
Kwakulo mboniso, kuvela indoda enompu omncinane nayo yafika yadubula. Kukwafike nenye indoda yesithathu. Emva kokuba bedubule uZamani, amadoda amabini, kula mathathu, aye adubula phezulu ngemipu ze emva koko, bobathathu, bayokhwela kule Benz baphela enyanyeni.
UNobhala weNelson Mandela Bay Regional Taxi Council, uAndile Andries, uthi bona bengooNoteksi abanalo ulwazi lwemiyalezo ejikeleza kumaqonga onxibelelwano ethi uLungisa uphembelele ukudutyulwa kukaZamani.
“Sicela bonke abo bayinxalenye nokuhambisa obu buxoki nolu lwazi lungaqiqanga ukuba bazikhwebule koku nanjengoko kungathi kudale imisantsa kwishishini lethu. Sicela inzolo kuba abasemagunyeni bayaqubisana nombandela wokubulawa kogxa wethu,” utshilo uAndries.
UMphathiswa woKhuseleko loLuntu eMpuma Koloni, uWeziwe Tikana, kwakunye nophethe amapolisa ephondo, uLieutenant General Liziwe Ntshinga, bamemelele kuluntu ukuba lunike amapolisa ithuba lokwenza umsebenzi walo, ngokuthi aphande esi sehlo.
Ababezenza amapolisa baphanga usapho, baqhotsa batya inyama yabo!