ZIINDLELA ezine ezithe zavalwa liSebe lezoThutho eMpuma Koloni ngentsasa yangoLwesine ngenxa yekhephu eligubungele iindawo ezithile kweli phondo.
Isithethi sezoThutho ephondweni, u-Unathi Binqose, uthi ezi zindlela zivalwe ngenxa yokuba mtyibilizi kwakunye nokuba nzima ukuqhuba kuzo.
Iindlela ezivaliweyo nguR56 phakathi kweMolteno neSteenburg, uN6 (ePenhoek Pass) phakathi kweJamestown neKomani, uN9 (eLootsberg Pass) phakathi kweRhafu neMetele kwanoR61 (eWappardsberg Pass) phakathi kweKaladokhwe neRhafu.
UBinqose uthi kukho iimoto ezivaleleke phakathi kweRhafu neMetele ngenxa yekhephu.
Ezinye iindlela eziphantsi kweliso elibukhali lamagosa ezothutho ngenxa yekhephu nguR67 eNico Malan Pass kwakunye noR58 eBarkley Pass phakathi kweKhowa neBarkley East.
Ezi ndlela (R67 noR58) zingavalwa nanini, utshilo uBinqose. ISebe libongoze abaqhubi ukuba baqwalasele nangakumbi xa besendleleni.
Kuvulwe isikolo esixabisa iR106-million KwaMaxhama