IPolisa laseMotherwell, eGqeberha, libhubhe engozini yemoto emva kokutshayiswa kwemoto yalo nguNoteksi obeqhuba enxilile. Umpu wePolisa uye wabiwa xeshikweni lidunduluze phantsi
Isithethi samapolisa uColonel Priscilla Naidu uthe isehlo senzeke uLieutenant Colonel Sandile Matam (51) ekwisangqa kwindlela ekufutshane kudederhu lweevenkile kwisitalato iTyinira eMotherwell. UNoteksi ebeqhuba iToyota Quantum kanti lona iPolisa litshayiswe lihamba ngeToyota Avanza.
UNaidu uthe iPolisa libhubhele kwindawo yexhwayelo. Yena uNoteksi uye wabanjwa wabekwa ityala lokuqhuba enxilile nelokubulala ngokungenanjongo. AmaPolisa avule netyala lobiwa kompu (9mm) wePolisa elibhubhileyo.
Umrhanelwa oneminyaka engamashumi amathathu ananye (31) uvele kwinkundla yaseMotherwell namhlanje.
UMkomishinala wamaPolisa kwiphondo leMpuma Koloni, uLieutenant General Nomthetheleli Mene, udlulise amazwi ovelwano kusapho lePolisa eliswelekileyo watsho evakalisa ukudana kwakhe ziindaba zokubiwa kompu wePolisa elibhubhileyo.
UMene uthe ukubiwa kompu wePolisa akujongeli phantsi inkonzo yesipolisa kuphela, kubeka esichengeni ukhuseleko loluntu. “Asifuni ukubonakalisa intlungu yethu kuphela kodwa sifuna nokuhlaba ikhwelo eluntwini ngelithi maluhlangane ukuze lulwe izinto ezigwenxa ekuhlaleni.
“Sicela uluntu ukuba luncedise amaPolisa ekufuneni umpu obiweyo kugwetywe nabo banetyala. Okwenzeke kuColonel Matam makuhlale kusisikhumbuzo sengozi amaPolisa ajongana nayo yonke imihla ekhusela abantu.
“Ukuze simhloniphe, masithumele umyalezo ongqongqo kwizaphulimthetho othi asizu kuzinyamezela izenzo zobugebenga ezinje,” utshilo uMene.
Ubuyile uloliwe phakathi kweKapa neRhawutini