Abahlali baseSlovo Park eMthatha basothukile sisithwakumbe sokudutyulwa kubulawe ixhegwazana elineminyaka eqikelelwa kumashumi asixhenxe ubudala ezinzulwini zobusuku bangoLwesibini.
Ngokwengxelo evakeleyo, ayilotyeli lokuqala kuhlaselwa lo mama, kulandela ukuhlaselwa kwakhe ngoNovemba wonyaka ophelileyo.
Omnye wabahlali baseSlovo ongavumanga ukubizwa ngegama obekhona kwindawo yexhwayelo uthe: “Sisothukile sesi senzo.
Lo mama udutyulwe ityeli lesibini kulandela ukudutyulwa kwakhe ngoNovemba nalapho washiyeka onzakele. Kwisiganeko sonyaka ophelileyo kubonakala ukuba umrhanelwa waveza umpu efestileni kodwa kweli tyeli umdubule ekufuphi lahlanza iselwa.”
“Ngethuba sifika, ixhoba belinamanxeba entloko,” utsho lo mhlali. Abahlali bakwagxeka umasipala wendawo iKSD ngokungalungiswa kwezibane ezonakaliswa zinqwelo-moya ngethuba lomngcwabo kabaw’ uNelson Mandela ngo2012.
Bathi ukuba bezisebenza izibane ngelisindile eli xhegwazana. Othethela amapolisa kwingingqi yaseMthatha uWarrant Officer Dineo Koena uthi, livuliwe ityala lokubulala kwisikhululo samapolisa.
UKoena umemelela nabani ongancedisa amapolisa kubanjwe umrhanelwa, aqhagamshelane namapolisa. Uphando luyaqhuba ngesi siganeko.
Iinzame zokufumana inkosi yeNtshona yoMthatha, uNkosi Jonas Ndzambule ziwe phantsi.
Igama lexhoba lisankonyiwe de kwaziswe izihlobo nezalamane. Akucaci ukuba sithini isizathu sokubulawa kweli xhegwazana okwangoku.
Libanjelwe isatifikethi sikaGrade 12 somgunyathi iGosa lezeMpilo