Likhangeleka limhlophe ingomso leZulukama Trust

UVIMBA wophuhliso lwamaphandle iZulukama Trust ubambisene nenkampani erhweba ngezabelo yaseMonti IKusasa Green ekuncedeni uluntu lwasemaphandleni kwezolimo kwakunye nokuthenga izabelo kumashishini emveliso.

Ikusasa Green inomzi mveliso weebhokisi zokugcina ukutya kupholile, kwanezabelo kwiLukhanji Leisure eneQueens Khasino kwakunye nehotele. Ngamashumi asixhenxe ookopolotyeni bamaphandle abayinxalenye yeZulukama Trust.

Isithethi sebhunga leZulukama, inkosana uJoseph Madlongwana uthe, lo vimba uzakunceda uluntu lwamaphandle lixhamle kwinkxaso karhulumente yezolimo nemveliso kwakunye noshishino kubarhwebi abazimeleyo.

“IZulukama Trust izakuba likhonkco kumalungu ayo norhulumente kwakunye neenkampani zabucala, umzekelo, imanyano evelisa uboya eyaziywa ngokuba yiWool Growers Association,” utshilo okaMadlongwana.

Ukwathe, “Sinookopoletyeni beegusha abasixhenxe, emnye kubo unekhulu lamathokazi eegusha, kwakunye neenkunzi ezine, ezenza i728 yeegusha. Kukwakho nelinye iqela elivelisa imifuno lithengise kwiindawo zasemaphandleni elincedwe liqumrhu lophuhliso lwephondo iECDC.”

Kwiiveki ezimbini ezidlulileyo, lo vimba ububhiyozela iminyaka elishumi oko wathi wasekwa eHewu. Kulo mbhiyozo uGugile Nkwinti ongumphathswa wobuyiselo lomhlaba unikezele ngeshedi yokucheba.

Le shedi yenze ukuba zibengamashumi amabini anesithathu iishedi ezikule ngingqi nezinceda iilali ezingamshumi amathathu anesithandathu.

Ubukwazinyaswe ngooSodolophu, uMxolosi Koyo waseChris Hani kwakunye noNozibele Makanda waseLukhanji. UMadlongwana ukwadize ukuba banayo nemveliso yenyama yenkomo ezityetysiweyo.

“Abaxheli ngoku bathenga kuthi, lo nto yenza umahluko kumakhaya afuye iinkomo,” ucacise watsho. Ukanti Ikusasa Green isayine isivumelwano sokuvelisa amashumi amabini amawaka eebhokisi zokugcina ukutya kupholile.

Lo mzi mveliso uzakuvula iziko eliseDimbaza ngoJulayi walo nyaka. UMkhululi Phakade ongusihlalo weKhula Investment udize ukuba lishumi lezigidi elizakutyalwa kumzi mveliso wakwa Ikusasa Green ozakuvulwa eDimbza ngokubambisana neECDC.