NgoMvulo kusasa kwenzeke ingozi emasikizi eGcuwa kuhola wendlela uN2, ngaselalini iBika apho ithe yasuba imiphefumlo emithathu yabantu, kuquka kubo nenkwenkwe eseneminyaka emine (4) kuphela ubudala ebihamba notata wayo.
Kule ngozi, kuye kwangqubana iveni kwakunye neToyota etekisayo elayisha abantu abasixhenxe, nebilayishe abantu ngethuba kusenzeka le ngozi. Abantu abathandathu baye babalekiselwa kwisibhedlele saseGcuwa beyokufumana unyango.
Kusasa ngoLwesibini isithethi seSebe lezoThutho eMpuma Koloni, u-Unathi Binqose, udize iindaba zokuba bane ngoku ababhubhileyo, ngowasetyhini nobengomnye kwisithandathu ebesibalekiselwe kwisibhedlele saseGcuwa ngoMvulo, ngoku inani lisukile kwisithathu. Lo wasetyhini ubhubhe ekuseni ngoLwesibini.
Kusenjalo, kwangoMvulo ngorhatya, kwingozi eyenzeke kwakuhola wendlela uN2 kwaPayne eMthatha, kubhubhe abaqhubi bobabini – oweOpel Corsa kwakunye noweNissan NP200 – ngethuba nazo zigilana ezi moto. Inani ngoku lababhubhileyo kwiingozi ezenzeke izolo bahlanu (5).
UXolile Nqatha udlulisa amazwi ovelwano kwiintsapho zamaxhoba angasekhoyo ekwadlulisa namazwi kwabo basalwela ubomi babo esibhedlele ekubeni baphile baphakame.
UNqatha uthi kubasebenzisi bendlela mabahlale bethobela imithetho yezendlela ngalo lonke ixesha ukuze kubenokuthintela iingozi ezinje.
UKumkani uMisuzulu uwurhoxisile umtshato wakhe wesintu