Ngubani oza kungena endaweni kaShivambu kwiEFF?

Umbutho we-Economic Freedom Fighters (EFF) uqukumbela amalungiselelo wenkomfa ezakonyula iinkokheli ezintsha zalo mbutho. Kokokuqala ukuba lo mbutho uye kunyula inkokheli uqhwalela emva kokuba ushiywe ngamadoda ebesecaleni koMongameli wawo uJulius Malema.

Ukushiya kukaSekela Mongameli walo mbutho, uFloyd Shivambu, kushiya imibuzo yokuba ngenene ngubani oza kungena endaweni yakhe njengoSekela Mongameli.

Njengayo yonke ke imidyarho, nakwiEFF akhona amagama ahamba phambili kusithiwa ngawo anokuthatha indawo yokuba nguSekela Mongameli. UNobhala Jikelele we-EFF uMarshall Dlamini, Godrich Gardee kwakunye noVuyani Pambo ngawona magama aphambili ekutyholwa ukuba angathatha indawo kaShivambu.

UShivambu unikwe isikhundla sokuba nguNobhala Jikelele kumbutho uMkhonto WeSizwe Party (MK Party) kaJacob Zuma. UShivambu ushiye lo mbutho ekunye noogxa bakhe abaphambili abaquka uDali Mpofu, Busisiwe Mkhwebane kwakunye noMzwanele Manyi.

Inkomfa ye-EFF iza kuqhubeka eNASREC eGoli ukusukela ngomhla weshumi elinesibini ukuya kumhla weshumi elinesihlanu kule nyanga.

Lo mbutho uyaqala ukuya kwinkomfa ekumila kunje uneengxaki zokushiywa ngamalungu aphezulu aquka uSihlalo kwakunye noSekela Mongameli.

Ukungacaci kwesicwangciso sezopolitiko se-EFF, ukungaboni ngasonye kwimiba equka iGNU zezinye zezizathu ezibangela iingxaki ze-EFF.

UShivambu ebedlala indima enkulu ebangele ukukhula kwe-EFF kule minyaka igqithileyo ukusukela oko yasungulwa ngonyaka ka2013.

Kumadoda ekulindeleke ukuba angene ezihlangwini zikaShivambu kulindeleke ukuba akwazi ngenene ukuwenza umsebenzi obusenziwa yile ndoda.

Ecacisa ngendima yakhe kwiEFF uShivambu wathi: “Ndingatsho ukuba isungulwe ndim kwasekusekweni kwayo iEFF, yonke into oyibonayo nge-EFF yaphuma apha kum entloko, nokuba ibhaliwe nokuba ngumfanekiso, ngumsebenzi wam,” wadlisela watsho uShivambu.

UMongameli we-EFF uMalema useyingangalala engekafuni kuchukunyiswa, nangona ubunkokeli bakhe bubangele iingxaki ezininzi kwiEFF. Kutyholwa ngelithi ukuhla kwenkxaso ye-EFF kunyulo kubangelwe kukunkaniza kwakhe kumcimbi wokuthethelela abantu bangaphandle.