OOSOMASHISHINI abasakhasayo eNelson Mandela Bay bayalelwe ukuba bagxile kuphuhliso lwabo, hayi ukumonelana ngethuba bekubanjwe indibano yokubonisana ngokukhuliswa koqoqoqsho lwasezilokishini phakathi korhulumente noosomashishini abasakhasayo.
Le ndibano ibibanjelwe kumabala ezemidlalo iNelson Mandela Bay Stadium kule veki. Usekela sodolophu womasipala wale ndawo, uBicks Ndoni, umphathiswa wephondo kwisebe lophuhliso loqoqosho uSakhumzi Somyo, iinkokeli zombutho we-National Federated Chamber of Commerce (NAFCOC) nomphathiswa kwisebe lophuhliso lwamashishini asakhasayo uLindiwe Zulu bebezimase lo msitho.
Izithethi zikarhulumente zigxeke oosomashishini abakhulayo ngokungamanyani, ukuxhwithana endaweni yokuba basebenze kunye besabelana nangezixhobo zokusebenza.
UZulu ubaxelele ukuba bakhe umanyano oluluqilima.
“Abanye benu bahla benyuka ezitalatweni bexhakazela ziincwadi nemiqulu kungekho nto iphucukileyo abeza nayo, yekani ukulwela unobenani, abelungu bona bayaxhamla ngeli xesha nina nilibele kukudlalisa,” utshilo uZulu.
UNdoni uthe endaweni yokujamelana, oosomashishini abamnyama mabahlangane rhoqo bakhulise amashishini abo.
“Ukufuthelana nokuqumbelana phakathi kwenu kuyakudala uqhusa noqoqosho lume ngxi kunokuhambela phambili, iilokishi zethu maziqhubele phambili zibe- yindawo apho ushishino lugquba khona,” utshilo uNdoni.
Umongameli wombutho weNAFCOC uLawrence Mavundla ukugxekile ukuxhatshazwa kwabemi base-Afrika ngeentetho ezithi bazokubulala amashishini abantu balapha, esithi ukufa kwamashishini ezilokishini yaba yinto yangabom eyabangelwa kukungena koobhazabhaza beevenkile ezilokishini.
IPirates iza kudlalela ukuyibetha iSundowns, utsho uJose Riveiro