INKUMANDA yezikhululo zamapolisa ezingqonge iRhafu uBrigadiya Rudolph Adolph uwothulele umnqwazi amapolisa amabini asePearston emva kokuleqa isiphekepheke semoto ebibaleka kule dolophana yakwiKaroo ngentseni yangoLwesine, ze emva koko afumana kuyo uboya bohlobo lweMohair.
La mapolisa mabini abone imoto yohlobo lweToyota Corolla engaqondakaliyo ebihamba kwindlela iKlipplaatberg ePearston.
Umqhubi wale moto uthe akubona amapolisa wawunyathela watshona umcephe. Namapolisa ke enze njalo, ayokuyifumana kwisitalato iPrince, kwasePearston, le moto.
Emva kokuyigqogqa bafumene iingxowa ezimbini zeMohair ezikumlinganiselo we160kg ezixabisa iR50 000.
Indoda eneminyaka engamashumi amathathu anesine iye yabanjwa yabekwa ityala lokufunyanwa inempahla ebiweyo. Le ndoda iza kuvela kwinkundla yasePearston ngoLwesihlanu.
Ukubiwa kweMohair yinto exhalabise uluntu oluhlala kwiKaroo nanjengoko obu boya, obuchetywa kwiibhokhwe zohlobo lweAngora, iyeyona dayimani yale ndawo ebangela intshukumo kuqoqosho lakwiKaroo.
Imimandla yeKaroo ithe gqolo ukuvelisa iMohair iminyaka engaphaya kwekhulu elinamashumi asixhenxe, ithumela obu boya kwihlabathi liphela.
Uboya beMohair buvelisa okuninzi okuquka iimpahla, iingubo kwanezinye izinto zehombo.
Ifunyenwe indoda yaseTshayina eyayixhwilwe, kwabanjwa abarhanelwa abathathu