Ugwetywe ubomi eziseleni uNkosinathi Malunga (31) waseNdevana eQonce emveni kokufunyanwa enetyala lokuphinda-phinda edlwengula intwazana eneminyaka esithoba kuphela ubudala.
Esi sigwebo siwiswe yinkundla ephakamileyo yaseBhisho kutshanje.
Iingxelo eziphuma emapoliseni zithi, umrhanelwa wayokubanjwa kwangoko ngamapolisa emveni kokuhletyelwa ngezi ndaba zokuxhatshazwa komntwana oselula.
Isithethi samapolisa aseQonce uLieutenant Siphokazi Mawisa uthe: “Ixhoba liye ladlwengulwa phakathi konyaka ka2013 ukuya kunyaka ka2015 lidlwengulelwa kwikhaya lalo eNdlovini Extension eNdevana kwaseQonce.”
UMawisa ukwadize ukuba emveni kokuthunyelwa kwetyala lakhe eBhisho uye wavela kathathu kwezi nkundla lade lafikelela kwitrayali ityala lakhe emveni koko uye wafunyanwa enetyala lokudlwengula waze wagwetywa ubomi.
Oyinkumanda kwabajongene noxhatshazo ngezesondo lwabantwana nabantu abadala kumapolisa aseQonce uMeyija Sandile Mahobe uye wasamkela esi sigwebo esithi sakuba sisifundo nakwabanye abenzi bobubi.
Ukwancome nomsebenzi woogxa bakhe esithi bakhawulezisile ukuza nolwazi olwaneleyo ngaphambili njengoko kuthathe nje iinyanga ezintandathu kuphela ukuphandwa kweli tyala esithi oku kubonakalisa umsebenzi omhle.
iMamelodi Sundowns inyathele iMpheni Defenders emdlalweni weNedbank Cup