UMONGAMELI weUDM uBantu Holomisa uthi uyathemba ukuba ukurhoxa emsebenzi kweNgqonyela yakwaEskom uBrian Molefe kuzakufundisa nabanye abakhankanywe kwingxelo yoMkhuseli woLuntu yokudlakatheliswa kombuso ukuba bazeke mzekweni.
UMolefe ubhengeze ukurhoxa kwakhe njengengqonyela yakwaEskom ngoLwesihlanu. “Ndifuna ukuyivakalisa eyokuba ukurhoxa kwam akulophawu lokuvuma ubugwenxa koko ndibona kufanelekile ukuba ndiyishiye le nkampani, … oko kusemdleni wokunqwenela ukubona ulawulo olu lulo luqhubeka,” utshilo uMolefe.
Kodwa uHolomisa uthi noxa nje engavumi bugwenxa lo kaMolefe, igama lakhe livele ngokumandla kwingxelo yoMkhuseli woLuntu edandalazise ukudlakatheliswa kombuso ngabahlobo bakaMongameli Jacob Zuma – usapho lakwaGupta.
“Siyathemba ukuba nabaninzi, njengoMolefe, abavela kule ngxelo, bawukwenza into elungileyo basikhwelele. UMnu. Zuma makakhokele ngomzekelo ngokuthi arhoxe kwisikhundla sakhe,” utshilo uHolomisa.
Libanjelwe isatifikethi sikaGrade 12 somgunyathi iGosa lezeMpilo