UKairo Forbes ugxekelwe intengiso ka-Ackermans noKhumo

Ronewa Jessica Mashamba

UKairo Forbes, intombi kaDJ Zinhle kunye nomrepha ongasekhoyo uAKA, ngundabamlonyeni emva kokuvela kwintengiso ka-Ackermans yamva nje yokubuyela esikolweni.

Le ntengiso, ekwanayo nomdlali kamabonakude uKhumo wenkqubo kamabonakude iScandal, ibangele ukugxekwa ngabathile abakholelwa ukuba le venkile ibifanele ukunika ithuba abantwana abangathathi ntweni.

Umntu kaFacebook uGomolemo Moela uvakalise inkxalabo yakhe, ebhala, “Andichasene nesigqibo sabakwa-Ackermans sokusebenzisa uKairo noKhumo ukuthengisa iyunifomu. Kodwa aba bantwana sele beneempokotho ezifumileyo. UKhumo udlala kwiScandal, uKairo yintombi kaDJ Zinhle kunye nomrepha ongasekhoyo uAKA.

“Kusenokwenzeka ukuba baya kwizikolo ezinganxibi kwa neeyunifomu abazithengisayo… Abathengi bokwenyani bakwa-Ackermans ngoomakhulu abavela ezilalini abaswayipha amakhadi abo akwaSASSA ukuze bathengele abazukulwana babo iiyunifomu ngenxa abazali babo bachatshazelwa kukungaphangeli kweli lizwe. Vumelani abantwana abangathathi ntweni bafumane ithuba lokuthengisa… Kuba bangabathengi bokwenyani…”

Umntu okuTwitter osebenzisa igama elithi @joy_zelda uvakalise izimvo ezifanayo, “Kufuneka sinyaniseke malunga noKairo, kutheni eza kubakho kuzo zonke iintengiso. Kuqala ibiyiNedbank, ngoku yiAckermans, kodwa unabazali abazizityebi kwaye unayo yonke into. Ngelixa abantwana abaninzi abangathathi ntweni behlwempuzekile kwaye bengaqatshelwa. Abantwana abantsundu baseMzantsi Afrika nabo babufanele obu bomi.”

Nangona kunjalo, ngaphandle kokugxekwa, kukwakho nenkxaso ephokokayo ngakuKairo kunye nesigqibo sevenkile.

Imvumi yoMzantsi Afrika uLady Du umkhusele uKairo ngelithi, “Lo mntwana sele etyhubele ebunzimeni! Uswelekelwe ngutata wakhe, uzama ngamandla ukujamelana nayo uyayibona loo nto. Ukuba iAckermans ifuna ukukhetha uKairo singoobani thina ukuba sifune ukuba bakhethe omnye umntu. Yekani ukwenza abantwana babe ngundabamlonyeni kumakhasi onxibelelwano. Bayagezelwa ezikolweni, bayazibona izinto enizibhalayo. Yekani abantwana!”

Yena u-@amira2423 ugxininise inzuzo yeshishini njengesizathu sesigqibo.

“UKairo unabalandeli abaninzi; ukuba bayamsebenzisa, abantu bazothenga. Kutheni le nto abantu abantsundu kufuneka bacinge ukuba banelungelo kwizinto? Abazali bakaKairo basebenza nzima ukuze baqinisekise ukuba uyawafumana la mathuba.”

U-@TheQueencess ucacise ngakumbi le ntsebenziswano, esithi, “UKairo lishishini ubuqu bakhe yiyo loo nto ubona uKairo kunye neAckermans, uthengisa iimpahla zakhe eAckermans, ke le yintsebenziswano yezoshishino. Ungumntwana ophumelele imbasa yokuphembelela, ke leyo yimpumelelo kwintengiso yeAckermans.”

Ngabalandeli bakaInstagram abangaphezulu kwesigidi kunye nembasa ngempembelelo yakhe, uKairo ngomnye wabantwana abadumileyo eMzantsi Afrika.

Eli bali liqale lavela kwi-IOL.