UKUNGENELELA kwesebe lokuhlaliswa koluntu kwenze umahluko kwinkqubo yokuhlaliswa koluntu kumasipala iNelson Mandela Bay.
Oku kuthethwe ngumphathiswa wesebe lokuhlaliswa koluntu kweli, uLindiwe Sisulu ngethuba esothula uhlahlo lwabiwomali leli sebe ePalamente.
Uthe, ukungenelela kwesebe lakhe kudale uzinzo kwimali eyabelwe inkonzo yokuhlaliswa koluntu, kwanokuhanjiswa kweenkonzo kulo masipala. “Sibuguqule ngokupheleleyo ubume bendlela yokuhanjiswa kweenkonzo zezindlu, sacwangcisa ngokutsha iinkampani ezisakhasayo ukuba ziwuthathele kuwo umsebenzi wokwakhela uluntu izindlu,” utshilo uSisulu.
Ukwathe ezi nkampani zokwakha zifumana uncedo kwi-arente yesebe lokuhlaliswa koluntu kwakunye nequmrhu elijongene nobume bezindlu iNHBCR.
USisulu uthe, isebe lokuhlaliswa koluntu lizimisele ukwandisa inani lolutsha elizibandakanya nomsebenzi wokwakha phantsi kwenkqubo ebizwa ngokuba yiYouth Brigade.
Uthe, “Sisenolutsha olukwinkqubo yeYouth Brigade kwiprojekthi yezindlu eBhayi, nakwiprojekthi yeN2 Gateway. Siliqikelela kwiwaka inani lolutsha esinokusebenzisana nalo kwiiprojekthi ezili101.”
Ukanti i-arente yezindlu yeli sebe iHDA inikwe uxanduva lokukhangela umhlaba wokwakha izindlu.
USisulu ukwathe, isebe lakhe aligxilanga kuphela ekwakheni izindlu zabangathathi ntweni. “Siyithwalise uxanduva lokwakha izindlu zexabiso leR150 000 ukuya kwi R300 000, nezizokwakhelwa abantu abanemivuzo engaphantsi kweR15 000 ngenyanga,” utshilo uSisulu.
Ubalule ootitshala, amapolisa kwakunye namanesi kule nkqubo. Ukwathe, eli sebe liphantsi koxinezelelo lokuphumeza inkqubo yokwakhelwa kwamagqala omzabalazo nesemva ngokwamanani wamagqala asele exhamle izindlu.
USisulu uthe ziyi5 600 izindlu ezakhelwe amagqala omzabalazo kunyaka ophelileyo. “Yandikhathaza kakhulu kunyaka ophelileyo into yokuva ukuba kukho igqala lomzabalazo eliswelekele emkhukhwini kanye ngalo mhla ndithetha ngenkqubo yokwakhelwa kwawo,” utshilo uSisulu.
Ukwamemelele amaqumrhu karhulumente ukuba adlale indima ngokuthi anike inkxaso yemali mboleko yokuthenga izindlu kubasebenzi bala maqumrhu.
USisulu uthe, nangona kusekuninzi ekufanele kwenziwe, kukho amaqela ezopolitiko, kwakunye neyantlukwano kwiANC exhokonxa uluntu ukuba luqhankqalaze.
iMamelodi Sundowns inyathele iMpheni Defenders emdlalweni weNedbank Cup