“Ewe, xa ungolukanga ubasemngciphekweni owongezelekileyo ngokuba usenesikhumba esigcina iintsholongwane kwilungu lakho lobudoda. Intsholongwane kaGawulayo iye ihlale apho. Xa wolukile ithuba lokuba le ntsholongwane ihlale kuwe lehla ngento engangomyinge we60% kodwa oku akuthethi ukuba owasetyhini ukhuselekile. Usenokumosulela. Sikhuthaza idyasi kamkhwenyane qho!” kutsho uLarissa Klatzinga, onguManejala wengingqi nommeli weAIDS Healthcare Foundation (AHF) kuMzantsi weAfrika.
Abakwa-AHF bebeseMonti kule veki iphelileyo bezokuzazisa ngokusesikweni kwiMedia yaseMpuma Koloni.
Bachaze ukuba sele bekhona kwiikliniki ezingama-55 eMpuma Koloni, kwaye owabo umsebenzi kukuxhasa nokufundisa abo badinga uncedo nonyango kwezikaGawulayo.
“Sesineminyaka elishumi sikhona ephondweni; savula ikliniki yethu yokuqala eXesi koka-2007. Kule minyaka ilishumi sizame kangangoko ukuxhasa iilali,” kutsho uHilary Thulare, oyingqonyela yeeNkqubo zika-AHF kuMzantsi we-Afrika.
Nangona inani labantu abosuleleka ngoGawulayo lehla ukusukela koka-2002, amantombazana aphakathi kweminyaka elishumi elinesihlanu namashumi amabini anesihlanu asengawona asemngciphekweni wokosulelwa.
Nomba wokuqelelana kweelali wenza umsebenzi wabe-AHF nzinyana. Kuphinde kubekho nempatho-gadalala yabazele uGawulayo kwiikliniki; bakhala ngoonontlalo nabongikazi ababaphatha kakubi.
Ukukhawulelana nalo mngeni, uKlatzinga uthe: “Thina kwa-AHF siqale inkqubo yokusebenzisa ulutsha; ukuze kubelula kulutsha olufuna uncedo. Siceba ukuqala le nkqubo yolutsha kwakulo nyaka kwiikliniki.”
I-AHF ngowona mbutho mkhulu ongenanzuzo kwicandelo leHIV/AIDS; banceda abantu abangama-720 000 kumazwe ngamazwe angama-39 afana nooMelika, Afrika, Yurophu nase-Asia.
Ababezenza amapolisa baphanga usapho, baqhotsa batya inyama yabo!