Owayesakuba ngumlingisi kuGeneration nobengumsasazi eJozi FM kutshanje udutyulwe wabhubha kwisikroxo esaziwa njengeMeli Lounge, ePimville (Soweto) phezolo.
Isithethi samapolisa esinguNomvula Mbense, eRhawutini, sithi amadoda amane angene egileka exhobe efohlele ezama ukukhuthuza wonke umntu obekwesisikroxo pha phakathi kwentsimbi yeshumi neyeshumi-elinanye ngobusuku bayizolo.
“Sikhangela amadoda amane ngoku. Ityala lokubulala nelokuphanga silivulile. Uphando luyaqhuba,” unabe watsho uMbense.
Ingqonyela yeJozi FM enguMpho Mhlongo izigqinile ezi ngxelo ngelithi: “Nditsalelwe umnxeba ezinzulwini zobusuku. Kuthiwa ebezama ukunceda abasetyhini baphume xeshikweni kuphangwa le ndawo. Udutyulwe xa kulapho.
“Mna ndifike kule ndawo umzimba wakhe udunduluze phandle,” kutsho uMhlongo nowongeze ngelithi bekukho nomnye umntu wesibini odutyulwe wabhubha kule ndawo.
“Sakumkhumbula sonke – ebengumhlobo olungileyo, yanga angalala ngoxolo.”
Abaziboneleyo bathi u ‘DJ Mandla’ udutyulwe kabini; esiswini nakwintamo phambi kokuba abarhanelwa bathathe nezihlangu zakhe.
UMandla wayekuGenerations pha koka-1999 ukuyokutsho koka-2006, wayedlala indawo kaSiphiwe Phosa pha.
UHlatshwayo yinzalelwane yaseSoweto eyaqala ukuba ngumlingisi pha koka-1996.
Imiyalezo yovelwano iyaphokoka kwimithombo yomnatha wonxibelelwano.
UJose Riveiro uchaza ukwenza ibaluleke ifolosi yePirates exakileyo