IBALELWA kwiibhiliyoni imali etyalwe ngabavelisi bombane ohlaziyekileyo. Imveliso yalo mbane seyidale malunga ne18 132 yamathuba omsebenzi.
Oku kudizwe ngumphathiswa wophuhliso loqoqosho, indalo kwakunye nokhenketho uSakhumzi Somyo ngethuba esothula intetho yohlahlo lwabiwo mali yeli sebe kwindlu yowiso mthetho yeMpuma Koloni. USomyo udize ukuba ushishino lombane ohlaziyekileyo ukwavelise amathuba amaninzi kumashishini asakhasayo. “Kungoku nje le projekthi ikwibakala lesithathu, kwaye ayi300 amashishini asakhasayo ayinxalenye yayo,” utshilo uSomyo. Uthe la mashishini adlala indima kwikhonkco lemveliso. “Uthethathethwano esilibambe neIDZ eMonti likumanqanaba aphezulu. Silindele ukuba litsale utyalo mali elikwiibhiliyoni ezimbini ezinesiqingatha namathuba engqesho kubantu abangamakhulu alithoba,” ucacise watsho uSomyo. Ukwathe, “Namaziko emfundo aphakamileyo kweli phondo athabatha inxaxheba ekuvelisweni kwalo mbane.” Udize ukuba ilishumi elinesihlanu imikhombe ebulelwe kweli phondo, nto leyo idala inkxalabo yokuba abazingeli bemikhombe ngokungeko mthethweni bangene kweli phondo.
USomyo uthe, kulo nyaka mali kuzakusungulwa iphulo lokuphuculwa konxweme laseBhayi ukuqanda ushishino olungavumelekanga kwindawo ezingaselunxwemeni. Uthe eli phulo lizakunwenwela nakumasipala iNdlambe, ePort Alfred . Udize ukuba isebe lakhe lizakuchitha izigidi ezilishumi zeerandi kwinkqubo yeEPWP koomasipala abaquka iNdlambe, iChris Hani, iNtabankulu, Amahlathi, iMakana uMhlontlo nakwindawo yaseMaletswai.
iMamelodi Sundowns inyathele iMpheni Defenders emdlalweni weNedbank Cup