UMongameli woMzantsi Afrika uJacob Zuma, ukhahlele kumjuxuzisi nomvelisi womculo uDJ Black Coffee, ogama lokwenene linguNkosinathi Maphumulo, ngenxa yempumelelo yakhe yokuba yimvumi yoMzantsi Afrika yokuqala ukuphumelela kwiBlack Entertainment Television (BET).
UBlack Coffee ube- yimvumi yokuqala yeli loMzantsi Afrika ukuphumelela iBest International Act: Africa kwiBET Awards, ngelixa yona imvumi esafikayo yaseNigeria, uFalz, enyukele ngasentla kwikhondo lakhe ngokuzithabathela iViewer’s Choice: Best New Act.
Ukubukela uBlack Coffee noFalz bezifumanela ezi mbasa, yithi nca kwiBET (DStv channel 129) ngoLwesibini umhla we-28 kweyeSilimela ngentsimbi yesixhenxe ngokuhlwa.
Ezi mbasa, nebezibanjelwe eMicrosoft Theatre eLos Angeles, bezisingethwe ngumdlali wemiboniso nonobuhle uEva Marcille kunye nemvumi uJidenna.
Lo msitho, ubuquka iGlobal Good Award ethiwe jize igqala lomculo uAkon.
UDJ Black Coffee ufumene ihlombe kwiimvumi ebechongwe nazo kweli bakala ezifana noCassper Nyovest ngethuba kukhwazwa igama lakhe.
Amawonga eBET asungulwa ngo2001 ukubhiyozela abemi belizwekazi le-Afrika nabaseMelika emculweni, ekulinganiseni kwimiboniso, imidlalo kwanezinye iinkalo zolonwabo.
“UDJ Black Coffee uyaqhubeka nokukhuthaza ulutsha lwethu ngempumelelo yakhe, nokumela eli kwiqonga lomculo lamazwe ehlabathi, nanjengomzekelo kwitalente yolutsha loMzantsi Afrika.
Ilizwe lethu liyazingca ngaye. Siyamhalalisela,” utshilo uMongameli Zuma.
Ababezenza amapolisa baphanga usapho, baqhotsa batya inyama yabo!