UMzantsi Afrika uqinisa amaqhina neAngola

Ukutyelelo laseburhulumenteni kwilizwe loMzantsi Afrika uMongameli welizwe laseAngola uJoao Lourenco.

“Kuyasivuyisa ukuba samnkele uMongameli Lourenco kweli loMzantsi Afrika ekunye negqiza lakhe, simthumelele umyalezo wokuvuyisana naye ngethuba ebesandula kuphumelela ulonyulo,” kutsho uCyril Ramaphosa.

Uthi uMzantsi Afrika neAngola ngamazwe anobuhlobo obudala, ukwabalule ukuba ela lizwe lincede amaqela eli afana neANC ebesilwela inkululeko.

“Ngonyaka ka2025 uMzantsi Afrika uza kutyelela ilizwe laseAngola ukuqhubela phambili ezinye zezinto esivulemene ngazo kolu tyelelo, sineenkampani zoshishino zeli ezingaphezu kwamashumi amabini eAngola,” utsho uRamaphosa.

Umbutho weANC usebenzise ela lizwe njengegwiba lokhuseleko ngeminyaka yokulwela inkululeko.

Ngenxa yeli futhe, urhulumente wobandlululo wathumela amajoni wakhe ukuba ayekugubhulula amajoni omzabalazo kwela lizwe.

“Ngamashumi amane anesine izivumelwano esifikelele kuzo kwakunye norhulumente waseAngola, sijonge ukusebenza kwezo zivumelwano ukuya phambili,” kutsho uRamaphosa.

Uthi banethemba lokuba intsebenziswano yabo neAngola iza kunceda ukuqinisa ukhuseleko kula mazwe mabini.

“UMongameli Lourenco usebenza njengelungu lekomiti yokhuseleko kwikomiti yokhuselo kumbutho wamazwe aseAfrika iAfrican Union,” kucacisa uRamaphosa.

URamaphosa uthi uncokole nale ndoda yaseAngola malunga negunya loMzantsi Afrika lokukhokela umbutho weG20. Sijonge ukuqhubela phambili nentsebenziswano yethu nelizwe laseAngola, injongo yethu ikukuqinisekisa ukuba imeko yoqoqosho nokhuseleko kula mazwe mabini,” uvale ngelo uRamaphosa.

ULourenco yena ucacise ngelithi olu lutyelelo lakhe lwesibini kweli loMzantsi Afrika.

“Ukusukela ngexesha lomzabalazo, amazwe ethu, uMzantsi Afrika neAngola, asebenze kakuhle kakhulu ukuqinisa unxibelelwano kwimicimbi yezoqoqosho nokhuseleko,” kutsho uLourenco.

Uhambisa athi uthathe isigqibo sokuba emva kokuba enyulwe kwakhona kunyulo obeluqhubeka eAngola, atyelele ilizwe loMzantsi Afrika kuqala.