Olwam ulwamvila libukhali, Nditsho nokufa akuthathinto, NdinguNozala weentsizi, Ndingumxabanisi othandwayo, Umnombo wamukwiintsipho, Imbali ngam isebhodleleni, NdiliDungamzi lokwenene.
Ndilikhwekhwe likaNtshweza,
NdinguNobangela weengozi,
Ndiyoxutha ingqondo nasemvekwini,
Ubutyhakala ndibudala nasexhegweni,
Ubuyatha ndibakha nakwixhewukazi,
Ndilishwangusha elingeva mithandazo, Ndiyayicuntsula ingqondo ndishiye ooZincinci, Ndiqavisa izinyabi,
Amagwala azibon’ ubukroti,
Nditsho oocwethe bazibon’ubukhulu, Ndingumcimi weentsizi.
Ndililitye lamanzi,
Intloko yam iqinile, Yodlula nelitye lolwalwa, Akungoku ndabakho,
Ndaziwa ngookhokho benu,
Ndiwuduba umzimba ngenjongo,
Ndiyawuchith’umtshato kaDengana,
Ndiyoyise ingqondo yetshivela,
Kweyetshijolo letshinitshini yona ndiyakhisela,
Ndingumkhohlisi ka- phembeshiya,
Ezam’ingcambu zisemphandeni,
Ndoja emsini.
Ndiyingcuka eyambethe ufele lwegusha,
Inzingo neembandezelo ndiyazihesha,
Iintlupheko neenkxwaleko zeza nam,
Ndisisiyobisi into endiyiyo,
Ndinolonwabo lomzuzwana,
Ndikuvikive ndikuqobe amathambo,
Usale utyhola amagqwirha,
Iintlungu zomphefumlo ndiyazithomalalisa,
Ndinguye umtshabalalisi.
Bandibiz’ uMabil’ebanda,
Into kaKrob’ emphandeni, Bambi bathi ndinguDlomdlayo,
Amaphanga ndiwashiya ethe jwenye,
Umzila wam ubonakala ngendwane,
Iipokoto ndizishiya zigqobhokile,
Ndidungudelisa ngomnxilo,
Ndimke nengqondo ndikushiye nebhabhalaza.
Ndilubhelu lomsele mna,
Nditsho iimbelukazi azindoyiki, Ngaphandle kwam umcimbi awuyonto, NdinguGqadambekweni, Apho ndikhoyo wonke ubani uxhelelw’ eXhukwane, Amanzi kaMaqoma, Gqabi likaLonji, Amas’ omhlontlo, Izihelegu zam zibashiya benezigxala, Inene utywala buyingxaki!
iMamelodi Sundowns inyathele iMpheni Defenders emdlalweni weNedbank Cup