Mlamli Clarence Makwetu,
Inciba emhlophe nomlambo
Indwe zizole ngathi zifile.
Ndabuza emntwini, wathi yehlil’ intlekele
Ndibaze iindlebe, wath’umntu akasekho uClarence Mlamli Makwetu;
Ndinge ndibethwa ngumbane kanti yintsholo ezilileyo yeentaka zaseGwatyu
Ndibeve bethetha besithi kukho ukufa okukhoyo esapha eMaqocweni;
hamba ke Tiyeka, Jojo Mabombo wakulo Bhizana
Ndibaze iindlebe ndizama ukuva, kwathwa akasekho uClarence Mlamli Makwetu
Ndive ngothekwana intak’eZulu esapha isithi ngenene akasekho uZikhali
Ndibuze kubo bathi bona ndingubani mna?
Ndisithi kuyinina ukushiywa zizangxa ngexesha lokuza korhatya
Kaloku urhatya lixesha lezikhova, zitsho zigqume zinge ziphethe nto
Zona azinto koko zizikhova kuba zezobumnyama, zigquma kuba zingagquma
Hamba ke Tiyeka, Jojo Mabombo wakulo Bhizana
Kuyinina ukushiywa kosapho zizangxa ngexesha lokungxama kwaba krebe
Hamba ke Tiyeka, Jojo, Mabombo wakulo Bhizana
Ndive ngesandi seNtabetafile isithi ilibonile eli gxogxo lase Hoyita
Ndive ngamaza eBlouberg esithi ayamazi uMlamli Makwetu
Ogeleketyane bazifikisele ukumxhaphaza bemthumela ngapha nangapha
Kuba kaloku obotshiweyo usisulu ke kwigwala
Hamba ke Tiyeka, Jojo Mabombo wakulo Bhizana
Uzumxelele uSobukhwe, uthi ayikho inyani eyogqithe eyakhe
Aba qhimgqoshe basaphithizela beteketa bethetha emva naphambili
Uzumxelele uNtantala noPokela uthi basakhala abantwana bendlu emnyama
Uzithi kubo kukho isifo esitsha esivela ngaseNdiya
Zubaxelele, uthi siyamdlakaza umzi omnyama asinalusini
Zusibulisele kooSabelo Phama nooMthopeng
Uzuthi kubo ngenene iyatshisa ikhanakhana evela eNdiya
Hamba ke Tiyeka, Jojo Mabombo wakulo Bhizana
Poqo yindoda ngenene
Kubhubhe abantu kwingozi eyenzeke phakathi kweGcuwa neDutywa!