Amapolisa ommandla waseMthatha abongoza abahlali ukuba bancedisane nawo kuphando olungakhokelela ekubanjweni kuvalelwe umrhanelwa odubule wabulala intombazana eqikelelwa kumashumi amathathu eminyaka ubudala konzakala isinqandamathe sayo esiqikelelwa kumashumi amane ubudala.
Esi siganeko senzeke kwindawo yaseMegacom ngaphandle kwedolophu yaseLibode ezinzulwini zobusuku bangoLwesithathu. Le ndoda ingeniswe buphuthu phuthu kwisibhedlele saseMthatha.
Ingxelo ebezingeka qinisekiswa ngamapolisa ngethuba sibhala eli nqaku zidize ukuba lo mqhubi uswelekele kwisibhedlele saseMthatha ngentlazane yanamhlanje.
Isithethi samapolisa kummandla waseMthatha neziphaluka uKapteni Dineo Koena, uthi amaxhoba adutyulwe kusetyenziswa ifestile
“Ngokwengxelo esiyifumeneyo indoda engaziwayo ifike yavulela ngeembumbulu isebenzisa umpu oluhlobo lwe-AK 47. Kufunyenwe amakhoba amathandathu eembumbulu kwindawo yexhwayelo. Kuvulwe ityala lokubulala. Akukabanjwa mntu okwangoku,” utshilo uKoena.
Ngethuba le ntombazana idutyulwa ibisendlini yalo mfana.
Isithethi sosapho lwale ntombazana uSizwe Kupelo, uthe “Sikhathazekile kakhulu kukudutyulwa kubulawe le ntombazana eselula kanje ingakumbi kukuphela kwayo kubazali bayo. Siyathemba abasemagunyeni bazokubamba bavalele abenzi balo mkhuba.”
Ngokwengxelo, indoda lilungu lombutho weBorder Alliance. Ngethuba eli phephandaba litsalela umnxeba ilungu lesigqeba lalo mbutho, lithe belingekafumani nkcukacha ngesi siganeko. Kususela kunyaka ophelileyo ukuzothi ga ngoku, sele kubulewe abantu abangaphaya kwamashumi amabini anesihlanu kuquka abakhweli nabaqhubi kumlo ophakathi kwemibutho emibini uNcedo neBorder. Unozala yindlela ephakathi koMthatha neLibode kunye nomzila uN2 odlula eSibangweni usingisa kuTsolo.
Libanjelwe isatifikethi sikaGrade 12 somgunyathi iGosa lezeMpilo