IKOMKHULU lamaXhosa aliwuvali umlomo yimbeko nobubele elibufumene ngethuba lotyelelo lalo eZimbabwe kwiveki ephelileyo.
IKumkani yamaXhosa uMpendulo Zwelonke Sigcawu, ephelekwa nguNkosana Xhanti Sigcawu, bebetyelele kwiKomkhulu lamaXhosa aseZimbabwe iNgxingweni eMbembesi kwiphondo iMatabeleland apho bekubekwa ngokusesikweni uNkosi Dumisani Ndondo.
UNkosi Dumisani ngunyana wenkosi ekhothamileyo uNkosi Michael Ndondo. Umsitho wokubekwa kwale nkosi ubuzinyaswe ngabaphathiswa bombuso kaMongameli Robert Mugabe kwanabantu bezoshishino.
Kwaba baphathiswa singabalula uAbednego Ncube, wophuhliso lamaphandle kwanokugcinwa kwamafa nenkcubeko yesizwe, kwano-Obert Mpofu wezothutho nophuhliso lweziseko.
UNkosana Xhanti Sigcawu uthi bachithe iintsuku ezintathu eZimbabwe.
“Samkelwe ngobubele obukhulu. Bekumnandi ngendlela emangalisayo. AmaXhosa aseZimbabwe anebhongo kakhulu ngathi,” utsho uSigcawu.
USigcawu uthi uNkosi Dumisani bamphe izipho ezifana nesidanga sakwaXhosa kwanentonga. “AmaXhosa aseZimbabwe asawagcinile amasiko akwaXhosa. Iyasivuyisa lo nto njengeKomkhulu lamaXhosa,” utshilo uSigcawu.
IKomkhulu lamaXhosa eNqadu kuGatyana linonxibelelwano namaXhosa aseZimbabwe. Ngonyaka ka2011, uSigcawu wachithela iKrismesi eZimbabwe nala maXhosa.
Iqela lebhola ekhatywayo lamaXhosa aseZimbabwe, likhe latyelela eNqadu ukuza kuthabatha inxaxheba kwitumente eyenziwa nguSigcawu.
sithandiwe.velaphi@inl.co.za
Meta AI, wamkelekile kwikhaya lethu lesiXhosa!