Abaqeqeshi beMamelodi Sundowns bancume olukabhulankethe emva kokuba iqela labo livuthulule iStellenbosch labuyela kwindawo yokuqala. Amasandawana ahloniphe uAnele Ngcongca ngokubetha iStellenbosch ngamagowuli amathathu eqandeni (3-0) emdlalweni weDStv Premiership ngorhatya eLoftus Stadium namhlanje. USteve Barker namakhwenkwe wakhe baye benethemba emva kokubetha iChippa United ngo’2-0 emdlalweni weveki ephelileyo. Bagoduka imisila iphakathi kwamathanga emva kokungadlali kakuhle eLoftus Stadium ngorhatya lwanamhlanje.
Ayitshaye isaqhuma Amasandawana; ngomzuzu wesihlanu ahambe phambili ngegowuli elifakwe nguPeter Shalulile ngentloko – ibhola ebigotywe ngobuchule nguKermit Erasmus. UThemba Zwane, uAndile Jali noLebo Maboe bebewulawula umdlalo esiswini. UKermit Erasmus ufake igowuli lesibini leSundowns emzuzwini wamashumi amabini anesihlanu. Kwiyiwe kwixesha lokuphumla iSundowns ihamba phambili ngo’2-0. Iqela likaSteve Barker lidlale umdlalo ongcono kwisiqingatha sesibini – kodwa ayikwazanga ukuyitheza amandla iSundowns ebisenza into eyithandayo.
UZwane ufake igowuli lesithathu emdlalweni. Kuthe kwakucaca okokuba iDowns iwuthathela kuyo umdlalo, uManqoba Mngqithi ukhuphe uKermit Eramus noTebogo Langerman. Iindawo zabo zithathwe nguLesedi Kapinga noLyle Lakay. Ngoku iSundowns ikwindawo yokuqala, iqokelele amanqaku alishumi elinesithathu emidlalweni emihlanu. Kanti yona iStellenbosch, esaphumelele kanye qha kule sizini, inamanqaku amahlanu kwindawo yeshumi. Kweminye imidlalo: iPirates ibambene ngo’1-1 neBaroka, iTS Galaxy ibambene neGolden Arrows ngo’1-1.
Mamelodi Sundowns: Onyango, Morena, Lakay, Nascimento, Madisha, Jali, Coetzee, Maboe, Erasmus, Zwane, Shalulile.
Amalalela: Mweene, Mudau, Lebusa, Kapinga, Kekana, Langerman, Domingo, Modiba, Makgalwa.
Stellenbosch: Langeveldt, Macheke, Van Heerden, Johannes, Robertson, Nange, Sinkala, Van Rooyen, Mendieta, Skelem, Khunyedi.
Amalalela: Stephens, Mthethwa, Scott, Mbekile, Moon, Dimgba, Msengi, Avontuur.
URamaphosa uyiqhwabele izandla iEPWP encede abantu abaninzi