UMzantsi Afrika ufumene amanqaku abalulekile emva kokubetha iSao Tome ebixhathisile ngo’2-0 emdlalweni ohlakulela iAFCON 22 obubanjelwe eMoses Mabhida Stadium kubusuku banamhlanje. Omabini amagowuli avele kwisigaba sesibini emva kokutsala nzima kwesokuqala. UPercy Tau ufake igowuli lokuqala ngepenela emva kokuwiswa ebhokisini. Elesibini lifakwe ngentloko nguBongani Zungu ongene kwisigaba sesibini. UNtseki neqela lakhe baya emdlalweni oseBhayi umsebenzi uphungukile nangona kusafuneka enye impumelelo. UThulani Hlatshwayo noMosa Lebusa benze umsebenzi omhle emva. Kanti uDean Furman uqinisekise okokuba aBafana Bafana abaxhatshazwa esiswini.
Amaqela omabini aye kwixesha lokuphumla kungekho nalinye elikwazileyo ukubhalisa ebhodini. Umdlalo ububambene – kodwa liqela likaMolefi Ntseki ebelithembisa ingathi lingenza into. UKeagan Dolly noThapelo Morena bebezama ukuhlasela besebenzisa amaphiko kwisigaba sokuqala – kodwa abadlali beSao Tome bebenendlela yokuziqhawula iibhola zoMzantsi Afrika. Ngokuhamba kwexesha, abadlali beSao Tome bakwazile ukubambelela bazama ukuya phambili. Nangona uPercy Tau ekhe wafumana ithuba elibhutyuzwe ngunozinti, ngelishwa lakhe khange abekho umntu wokugqibezela ibhola. Kuthe kusiyiwa kwixesha lokuphumla yabe iSao Tome ikhabele uRowen Williams kathathu.
Isigaba sesibini siqale ngendlela eyahlukileyo, uThemba Zwane noTau benze iintshukumo eziya phambili futhi ezithembisayo. Uwiswe ebhokisini uTau kanti lithuba loMzantsi Afrika. Uyibeke emnatheni ngokwakhe, ngalo ndlela ubeke aBafana Bafana phambili ngegowuli elinye. UKamohelo Mokotjo ukhutshiwe kwisigaba sesibini, indawo yakhe ithathwe nguBongani Zungu otshintshe umdlalo. Injongo kaNtseki ibicacile: ebefuna indlela yokuqhekeza iSao Tome ebivale mba emva. UDolly noLebogang Manyama abakwazanga ukusebenzisa amathuba ebekufane enze umahluko kwisigaba sesibini. Emva kokuphosa amathuba amabini, uBongani Zungu ufake igowuli lesibini waba uMzantsi Afrika uyaphumelela.
Luthatha lubeka usapho obeluthenjiswe ngoncedo kumngcwabo womzali ogetyengiweyo!