Entsimini

IKumkanikazi yamaXhosa ifumene izixhobo eziza kunceda ukuphuhlisa abantu bayo

Cwayita Nondula|Published

UMphathiswa weSebe lezoLimo uNonceba Kontsiwe ekunye neKumkanikazi yamaXhosa uNozizwe Sigcau ngethuba emnikezela ugandaganda, izixhobo zokusebenza nenkunzi yenkomo.

Image: Olwetu Batyi/DoA

IKumkanikazi yamaXhosa uNozizwe Sigcau kunye namanina engingqi yakhe banikwe ugandaganda, izixhobo zokusebenza kunye nenkunzi yenkomo yohlobo lweNguni liSebe lezoLimo eMpuma Koloni – ezi ziinzame zokukhuthaza uphuhliso lwezolimo kule ngingqi ukuze kudaleke amathuba emisebenzi nokukhuthaza imveliso yokutya.

UMphathiswa wezoLimo kweli phondo, uNonceba Kontsiwe, unikezele uKumkanikazi ngezi zixhobo kumsitho obubanjelwe eNqadu Great Place kuGatyane.

UKumkanikazi uSigcau uvakalise umbulelo wakhe, echaza esi senzo njengento ekhuthazayo kubantu basetyhini abakwezoLimo. Ubethelele indima ebalulekileyo edlalwa ngabasetyhini kwimveliso yokutya, ebalula ukuba abantwana basoloko bexhomekeke koonina ukuze bafumane ukuya ngaphantsi kwempumlo.

UKumkanikazi ugxininise ukubaluleka kokuba abasetyhini bavelisele iintsapho zabo ukutya kwaye bathengise okunye kwiimarike, ngaloo ndlela babenegalelo kuqoqosho lwasekuhlaleni.

UKumkanikazi uSigcau uvakalise uchulumanco ngeli phulo leli Sebe, esithi: "Kule nyanga yamanina, ndichulumancile ngento esenzele yona iSebe, siza kuzama ukuxhobisa amanina ukuze ondle iintsapho zawo."

Ukwagxininise ukubaluleka kokuveliswa kokutya ekuhlaleni esithi izikolo zale ngingqi zineenkqubo zesondlo ezinokuthi zixhaswe ngamafama asekuhlaleni endaweni yokuxhomekeka kwizixhobo zangaphandle.

ISebe lithe eli nyathelo lihambelana nesicwangciso sabo sokuxhobisa abasetyhini kwicandelo lezolimo, ukujongana nokungakhuseleki kokutya kunye nokukhuthaza ukukhula koqoqosho. "Ngokuxhasa abasetyhini kwezolimo, iSebe lijonge ukuvula isakhono sabo kunye nokomeleza ukuthatha kwabo inxaxheba kweli candelo," itshilo ingxelo.

UMphathiswa uKontsiwe uthe: "Siyayiqonda into yokuba uBukumkani bunamakhosikazi aqhuba iinkqubo zokuphuhlisa uqoqosho lwasekuhlaleni, kungoko silapha ukunceda.

"Sifuna abantu baseNqadu basebenze umhlaba, balime iigadi namasimi.

UMphathiswa ukwavakalise intembelo kumandla oBukumkani okuba ngumzekelo. "Siyazi ukuba uBukumkani buhamba phambili kuphuhliso kwaye bayakwazi ukukhuthaza abantu ukuba bathathe inxaxheba kwiinkqubo zeSebe," utshilo.