ULehlohonolo Seema kulindeleke ukuba ayifunqule iSiwelele
ULehlohonolo Seema ngumqeqeshi omtsha weSiwelele FC.
Image: Siwelele FC
ULehlohonolo Seema uthweswe uxanduva olukhulu lokufunqula abatshakazi bePSL iSiwelele FC nanjengoko esanda kubhengezwa njengomqeqeshi omtsha.
Lo wayesakuba ngukapteni weBloemfontein Celtic uza kukhokela iSiwelele FC esandula ukuthenga iSuperSport United ukuze idlale endaweni yayo kwiBetway Premiership.
Limazisa njengomqeqeshi omtsha, eli qela libhale kumakhasi onxibelelwano: "Ukusuka kuthi, ukuya kuni. Siyazingca ukwazisa uLehlohonolo Seema njengomqeqeshi omtsha weSiwelele Football Club. Isahluko esitsha siyaqala."
ULehlohonolo Seema ngumqeqeshi omtsha weSiwelele FC.
Image: Siwelele FC
Ukusukela oko uSeema exhome izihlangu zakhe zokudlala ibhola, uzenzele igama njengomqeqeshi wamaqela ohlukeneyo. Uncede iChippa United yasinda ezembeni ngethuba engumqeqeshi wayo, ukhe waqeqesha iGolden Arrows neSekhukhune United, ukubalula nje amaqela ambalwa.
ISiwelele asiyoBloemfontein Celtic, nanjengoko la maqela ahluke ngokusemthethweni nangokwakheka kwawo. Iqela iSiwelele lithengwe ngusomashishini uCalvin Lee John, unyana womphathiswa wezemidlalo uGayton Mackenzie.
Iingxelo zithi iSiwelele ilindele imvume kwiPSL ukuba ifudukele eBloemfontein kwaye ibize le ndawo njengekhaya. Eli komkhulu laseFreyistata lidume ngabalandeli balo bebhola ekhatywayo ababesoloko befuna ukuba iqela labo abalithandayo eliluhlaza namhlophe libuye emva kokuba uShauwn Mkhize elithenge waqala iRoyal AM wayifudusela eMgungundlovu negxothiweyo kwiPSL ngenxa yeengxaki zemali.