IRichards Bay incwase ukuwisa iMamelodi Sundowns zisuka kwiMTN8 eqala ngempelaveki

Umqeqeshi weRichards Bay, uRonnie Gabriel, uyityityimbisele umnwe iMamelodi Sundowns ngelithi iqela lakhe liza kudlalela ukuyibetha. UGabriel ukuthethe oku kwindibano neentatheli phambi komdlalo weMTN8 Cup oza kube uphakathi kweRichards Bay neSundowns ngorhatya (18:00) ngeCawe, eLucas Moripe Stadium.

Iintshatsheli zeBetway Premiership ziza kwamkela iqela laKwaZulu-Natal elangena kwiTop-8 ngomzuzu wokugqibela kwisizini egqithileyo emva kokungqiniba amaqela aquka iKaizer Chiefs. UGabriel uya esazi kakuhle ukuba iqela lakhe liya ePitoli lisazi kakuhle ukuba liphantsi koxinizelelo.

Kudlalelwa indebe uMiguel Cardoso afunayo ukuyithatha emva kokuphoswa yiNedbank Cup kwisizini egqithileyo. Ngethemba lokuba iRichards Bay iza kudlala umdlalo ophucukileyo emva kokuqhuba kakuhle kwitumente yamaqela aKwaZulu-Natal kwiveki ephelileyo.

Umqeqeshi uxelele iintatheli ukuba uxinizelelo lukwiSundowns yona ekulindeleke ukuba iphumelele njengeqela elikhulu neliqhube kakuhle kwisizini ephelileyo. "KwiMTN8, siyazi kakuhle indlela athelekiswa ngayo amaqela. Sidityaniswe neSundowns ngoba yiyo ebiphambili kwiBetway Premiership," utshilo umqeqeshi phambi komdlalo wokuqala kwisizini entsha.

"Uxinizelelo alukho kuthi. Into esiyifunayo thina kukuzilwela futhi sidlale ngokukhulu ukukhululeka. Umdlalo ozayo usinika ithuba lokulungiselela ukuqala kweBetway Premiership. Singavuya kakhulu ukuba singafumana iziphumo ezinokusithatha zisise kumjikelo olandelayo kwiMTN8," utshilo uGabriel phambi komdlalo obalulekileyo.

"Lo mdlalo uza kusinika ithuba lokujonga ukulungela kwethu isizini entsha sidlala neqela elikhulu kwizwekazi le'Afrika. Siyibonile indlela iSundowns ewasokolise ngayo amaqela amakhulu kwiFifa Club World Cup.

"Siyakwamkela ukuba kwiTop-8 emva kwendlela esiqale ngayo isizini egqithileyo. Indawo esivale kuyo ingaphaya kobesikulindele ngoba ixesha elide besisemsileni. Okwethu kukuya emdlalweni sibethe iSundowns," utshilo umqeqeshi weRichards Bay.