iChippa United yamkele inqwaba yabadlali abatsha eGqeberha
Yamkele abadlali abasibhozo iChippa United phambi kokuvula isizini ngomdlalo oseGqeberha.
Image: I'solezwe
Phambi komdlalo omkhulu ongempelaveki eGqeberha emalanga ngoMgqibelo, iChippa United ibhengeze amagama asibhozo abadlali bayo abatsha. Kweso sibhozo sabadlali, abahlanu ngabalapha kwiphondo leMpuma Koloni.
Ukubhengezwa kwabadlali abane abatsha kwiChippa United yinto eza kwamkelwa ngovuyo ngabantu baseMpuma Koloni abenethuba elide bekhwina. Konke oku kulandela ukubhengezwa kukaSinethemba Badela njengomqeqeshi omtsha kwinyanga ephelileyo noSinesipho Mali waseQonce ongumlawuli oyintloko.
UThulani Mini obuyele kwiChippa emva kokudlalela iqela laseKapa. Wayesuka kwiChippa kakade phambi kokuhamba kwakhe. Yena uKhaya Mfecane ufika efumbethe amava njengomdlali weqela lesizwe (SA Under-23).
Ngumdlali odlala esiswini oza kusebenzisana nabadlali abafana noGoodman Mosele obuyele kwiChippa ngemboleko emva kokungadlaliswa kwiPirates kwisizini edlulileyo. Omnye umdlali nguThamsanqa Magwaza osuka eMbizana. Ngumdlali ohlaselayo onobuchule bokudlala ephikweni.
Yena uAzola Tshobeni ufika esuka kwiPirates. Ngumdlali emthathe ngokupheleleyo iChippa oza kuqinisa isisu. Omnye wabadlali abaziwayo abatyikitywe namhlanje nguSammy Seabi odlalele amaqela aquka iPolokwane City neMamelodi Sundowns.
Emva kokuhamba komnye unozinti odlalela AmaZulu ngoku, uElson Ayanda Sithole ngunozinti omtsha. Omnye wabadlali abafikileyo nguAbdoulaye Mariko osuka kwiPirates ngemboleko. Ngomnye wabadlali oza kujongwa kakhulu emva kokubonakala kwiPirates ngethuba idlala umdlalo weMTN8 kwiveki ephelileyo.
IChippa iza kudibana neSundowns emdlalweni weBetway Premiership omkhulu emalanga ngoMgqibelo, eNelson Mandela Bay Stadium. Wonke umntu unomdla wokubona indlela abaza kuqhuba ngayo abadlali abatsha emva kokuchithwa kwenqwaba yabanye abadlali abaquka abaliqela abanamava ekupheleni kwesizini ka2024/25.