UTinkler ucacisa okuncede iqela lakhe elibethele iPirates kowayo
uEric Tinkler uzamkele ngovuyo iziphumo eziveliswe yiSekhukhune United ebethe iPirates emdlalweni weBetway Premiership.
Image: Itumeleng English
Emva kokuwisa i'Orlando Pirates emdlalweni wokuqala, umqeqeshi weSekhukhune United uwamkele ngovuyo amanqaku amathathu. IPirates ibethwe ngegowuli elinye eqandeni emdlalweni weBetway Premiership obubanjelwe e'Orlando Stadium ebigcwele abalandeli abagoduke bephoxekile emalanga ngoMgqibelo odlulileyo.
Kuyiwe kwixesha lokuphumla kungekho qela elikwazileyo ukubhalisa ebhodini nangona umdlalo ubunawo amathuba. Abuyele ebaleni amaqela omabini esazimisele - kodwa ekhangela into enye. Ibhakuzelise umnatha iSekhukhune United ngebhola efakwe nguSiphesihle Mkhize.
Oku kwenzeke emva kokuba abadlali bePirates befake engxakini uSipho Chaine oshiywe yibhola ezama ukuyichitha. IPirates iye emdlalweni izithembile emva kokubetha iPolokwane City emdlalweni weMTN8.
Kodwa nakubeni iPirates ibinamandla emdlalweni ogqithileyo - kodwa kukhona ukungahlangani kakuhle komdlalo wabadlali abafikayo nabo kudala bekhona. "Bekubalulekile ukuvula isizini ngokuphumelela," utshilo uTinkler emva komdlalo.
"Umdlalo wanamhlanje usibonise umgama esiwuhambileyo kwicala lamalungiselelo wesizini. Sizama ukwakha iqela eliqeqeshekileyo," utshilo uTinkler phambi kokuncoma uMedupi Thokolo ofikayo oye wachongwa njengoyena mdlali oqaqambileyo emdlalweni ogqithileyo.
UThokolo usuka kwiCasric Stars edlala kwiMotsepe Foundation Championship. "Unekamva eliqaqambileyo kakhulu ebholeni ekhatywayo. Ndibukele emidlalweni emibini nje kuphela ndambona ukuba ungumdlali wasemva odlala kakuhle," utshilo uTinkler.
Uthe iziphumo ezihle zifunyenwe liqela lakhe ngoba lizimisele futhi nabadlali badlalela ukuphumelela. ISekhukhune iza kudibana neTS Galaxy emdlalweni weBetway Premiership ngorhatya ngoLwesithathu wale veki.
Ngumdlalo oza kunika umdla kakhulu ngoba iTS Galazy iza kuya kwiSekhukhune inomsindo emva kokubethwa emdlalweni weMTN8 kutshanje. Ngempelaveki, iSekhukhune United iza kuqubisana neStellenbosch FC emdlalweni weMTN8 wokuqala.