UMaMkhize usiwe enkundleni ngobunini beMbabane Highlanders
Owayesakuba ngumnikazi weMbabane Highlanders FC, uBheki Simelane, use kwinkundla yamatyala usomashishini waseThekwini uShauwn Mkhize malunga nobunini beqela.
Image: Ayanda Ndamane / Independent Newspapers
Kukho ukungavisisani ngobunini beMbabane Highlanders AM FC yaseSwatini, umnikazi omtsha uShauwn Mkhize usiwe kwiNkundla ePhakamileyo ngulowo wayesakuba ngumnikazi weqela uBheki Simelane.
USimelane uthathe amanyathelo asemthethweni kwiNkundla ePhakamileyo yaseSwatini, ebanga ukuba wasuswa ngokungekho mthethweni kwisikhundla sakhe kwaye usengumnikazi ofanelekileyo weqela, ephikisana nebango likasomashishini waseMzantsi Afrika uAlfred Kgomongwe lokuba ubunini butshintshelwe kuMkhize.
NgoLwesibini, owayesakuba nguMlawuli oPhetheyo weMbabane Highlanders uMandla Shongwe uqinisekise ukuba lo mba uphambi kwenkundla.
"Iqela liye lahluthwa kuthi ngokungekho mthethweni. Iqela liselelethu," utshilo uShongwe, ngokokutsho kweKickOff.
"Sinekhontrakthi eqhubayo kude kube sekupheleni kwesizini ka2025/26. UMaMkhize wathembisa ukudibana nathi azame ukuwusombulula lo mba. Ayikenzeki loo nto, kungoko siwusa kwiNkundla ePhakamileyo lo mba," utshilo.
Ayikokokuqala uMaMkhize ebandakanyeka kwinto ethethisayo ngobunini beqela lebhola ekhatywayo. Ukungena kwakhe kwibhola ekhatywayo yaseSwatini kuza emva kokuba iqela lakhe langaphambili, iRoyal AM, ligxothiwe kwiPSL ngenxa yeengxaki zemali. Eli qela lafakwa kwifandesi yiSARS ukuze ibuyise izigidi ezingamashumi amane eerandi (R40 million) azityalayo kwirhafu.
Emva kwenkqubo ebanzi yokuthengisa, usomashishini waseThekwini uRoy Moodley ubonakale ephumelele ugqatso lokuthenga eli qela, kodwa emva kokungakwazi ukukhupha imali, intengiso [yeli qela] khange iphumelele, kwaye iligi yagqiba kwelokuba ilikhuphele eli qela.