Ilungise iimpazamo zayo iMamelodi Sundowns phambi komdlalo omkhulu
iMamelodi Sundowns ibethe AmaZulu FC ngo'2-0 emdlalweni weBetway Premiership obusePitoli.
Image: MS/Facebook
UMiguel Cardoso uzamkele ngovuyo iziphumo eziveliswe liqela lakhe ekuqaleni kwale veki. Oku kulandela emva kokuba iMamelodi Sundowns ibethe AmaZulu ngamagowuli amabini eqandeni emdlalweni weBetway Premiership obubanjelwe eLoftus Stadium kubusuku bangoLwesibini wale veki.
Impumelelo yeSundowns ilandela ukungaqhubi kakuhle kwayo emdlalweni ebambene kuwo ngegowuli neChippa United ngempelaveki egqithileyo eNelson Mandela Bay Stadium, eGqeberha. Umdlalo wale veki iSundowns ilungise iimpazamo kuwo.
AmaZulu afakwe engxakini zisuka emdlalweni yiSundowns ehlasele macala onke isebenzisa isantya esiphezulu. Ifolosi eyingozi, u-Iqraam Rayners, inike iSundowns igowuli lokuqala ekuyiwe kwixesha lokuphumla ikhokela ngalo ebhodini.
Kwisigaba sesibini, igowuli lesibini lifakwe nguTashreeq Matthews emva kokuba AmaZulu oyiswe kukuchitha ibhola ebhokisini. Nangona ukuphumelela kweSundowns kwamkelwe kakuhle - kodwa umqeqeshi wayo ukhale ngebala ebelimtyibilizi nelibadlalise kakubi abadlali bakhe.
"Ndicinga ukuba sidlalise abadlali kwiindawo abangazifanelanga ngenxa yemeko yebala. Bekunzima ukunikelana nokujikeleza ebaleni ngenxa yebala elimtyibilizi," utshilo uCardoso emva kokuba iSundowns ibhalise impumelelo yayo yokuqala yatsho yayokuhlala kwindawo yesibini emva kweMarumo Gallants ebethe iPirates ngamagowuli amabini kwelinye.
"Siliqela elihlaselayo xa sisebaleni - kodwa bekunzima namhlanje. Yah, sizilungisile iimpazamo ngokufaka abadlali abangasinceda emdlalweni," utshilo umqeqeshi emva komdlalo. Emva kokukhubeka emdlalweni wokuqala, uCardoso uphinde waqinisekisa ukuba iSundowns idlalela ukuphumelela xa isebaleni.
"Siliqela elisoloko lidlalela ukuphumelela ngamaxesha onke. Zisiphoxile iziphumo zomdlalo wokuqala - kodwa siyamkele le nto. Ukuba ubungangena endlini yethu yokutshintsha, bekungathi kufiwe la mini.
"Zange siphatheke kakuhle ngoba sadlala ntanganye neChippa emdlalweni ekwakufanele ukuba siwuphumelele," utshilo uCardoso. Amasandawana aza kujamelana nePirates emdlalweni wokuqala neMTN8 emalanga ngoMgqibelo.