Umqeqeshi wePirates wenze isithembiso kubalandeli phambi komdlalo omkhulu weMTN8

Amaqela amakhulu ebholeni ekhatywayo eMzantsi Afrika aza kuswantsulisana emdlalweni omkhulu namhlanje. Oku kuza kwenzeka xa kudibana i'Orlando Pirates neMamelodi Sundowns emdlalweni weMTN8 Cup obekelwe intsimbi yesithathu emalanga e'Orlando Stadium.

Omabini la maqela aya emdlalweni efuna impumelelo ngoba alambele ukubethelela ubunganga bawo ebholeni ekhatywayo. Ngaphezulu kwalo nto, uMTN ubeke esichengeni ishumi lonke lezigidi zerandi (R10-million) elakuthathwa liqela eliphakamise indebe ekugqibeleni.

Emva kokubethwa emidlalweni yeBetway Premiership ilandelelana, kunyanzelekile iPirates izilahlele nofele xa idibana neSundowns emdlalweni ojongwe ngamehlo abomvu ngabalandeli bebhola ekhatywayo.

Kunyaka ophelileyo, iPirates yenze imbali ngokuba liqela lokuqala eliphumelele iMTN8 Cup amatyeli amathathu elandelelana phantsi kukaJose Riveiro owahambayo. Umqeqeshi okhoyo, uAbdeslam Ouaddou, unoxanduva emagxeni wakhe lokuthatha apho ayeke khona uRiveiro owafika engenambali yeendebe njengaye.

Ukubethwa kwePirates kuye kwabathandabuzisa abalandeli abancithwa ngapha nangapha kumakhasi onxibelelwano. Nangona kunjalo, uAbdeslam uthe amajoni wakhe aza kufela emfazweni namhlanje eSoweto.

Ukubethwa kwePirates kungamongezela iingxaki uAbdeslam ogxekwayo ngenxa yokungabasebenzisi abadlali abafana noThalente Mbatha, uDeano Van Rooyen noTshegofatso Mabasa ofumene amagowuli aliqela kwisizini egqithileyo.

Isikhalo sabalandeli usivile uAbdeslam - kodwa akukho bani owaziyo nokuba uza kudlalisa abanye abadlali na. "Ndiyakuva ukuxhalaba kwabalandeli. Benziwa kukuba belithanda iqela labo. Ukuphoxeka kuza kubakhona - kodwa ndifuna ukubathembisa," utshilo umqeqeshi.

"IPirates iza kuvuka. Siza kwenza kwenza konke okusemandleni wethu ukuze bonwabe nabo. Isizini isaqala," utshilo uAbdeslam ethetha neentatheli kule veki. Ezimnyama ziya emdlalweni wesibini weMTN8 emva kokuba zibethe iPolokwane City ngamagowuli amabini eqandeni.