Ukuhamba kukaSinethemba Badela kuziphazamisile iingqondo, uvumile uNyatama
UMusa Nyatama uvumile ukugxothwa komqeqeshi ukuba kubenayo indawo yokuphazamisa iChippa United engonjwe yiTS Galaxy.
Image: Yanga Nothanga/Maya Images
Umqeqeshi weChippa United omtsha, uMusa Nyatama, uvumile ukuba ukuhamba kukaSinethemba Badela kubenako ukuphazamisa emva kwedemesha eyenzeke eMonti ngoLwesibini.
Oku ukuthethe ngethuba ethetha neentatheli emva kokuba iChippa United ihlazwe yiTS Galaxy ngemvula yamagowuli amane kwelinye emdlalweni weBetway Premiership obubanjelwe eBuffalo City Stadium ngobusuku bangoLwesibini.
Inqwaba yabalandeli abaphume ngobuninzi iye yanyanzeleka ukuba ibukele iChippa inqunqelwa egoqweni engqeleni ebiqhaqhazelisa amazinyo emdlalweni wayizolo. Ibhalise kuqala iChippa ngegowuli elifakwe nguKhaya Mfecane emizuzwini yokuqala kwisigaba sokuqala.
Emva koko, umdlalo wayo uye wehla endaweni yokuba unyuke. Ibuye ngamandla iTS Galaxy ebikhangela impumelelo yayo yokuqala. UPuso Dithejana ubhakuzelise umnatha phambi kokuphela kwesiqingatha sokuqala. Kwisigaba sesibini, iTS Galaxy ibidlala yodwa ebaleni.
UDithejana wenze imbali ngokufaka amagowuli amathathu eyedwa. Elinye lifakwe nguMlungisi Mbunjana oyinzalelwane yakwaBhaca kwiphondo leMpuma Koloni. Noxa kungekho nto ebhaliweyo ekhutshiweyo, kuye kwacaca ukuba nyhani uBadela ususiwe esikhundleni njengomqeqeshi emva kwemidlalo emibini qha.
Iindaba ezijikeleza kumajelo eendaba zithi uBadela ubhidene ngendlela yokwenza izinto noSinesipho Mali ongumlawuli weqela. Indawo yakhe inikwe uNyatama. "Yah, sifake igowuli kuqala emdlalweni - kodwa emva koko iingqondo zethu ziye zaphazamiseka," utshilo umqeqeshi.
"Ifumene amagowuli iTS Galaxy ngamaxesha abalulekileyo emdlalweni. Nakwisigaba sesibini khange sidlale kakuhle konke konke," utshilo uNyatama othethe neentatheli emva kweyure kuphele umdlalo.
"Ngokwasengqondweni, okwenzekileyo kuphazamise wonke umntu. Nangona kunjalo, akukho nto endingayithetha ngalo nto ngoba sisenemidlalo esijongene nayo. Singabaqeqeshi sinoxanduva lokuqinisekisa ukuba iqela likulungele ukudlala emdlalweni olandelayo," utshilo uNyatama emva kokubethwa kweChippa United okwesibini kule sizini.
Iqela lebhola ekhatywayo laseMpuma Koloni liza kuzama ukufumana amanqaku apheleleyo kwiveki ezayo xa lidibana neRichards Bay ebethwe yiKaizer Chiefs ngoLwesibini ebusuku.