UTrevor Manuel ukhokela ikomiti elungiselela iCricket World Cup!
UMphathiswa weZemidlalo, uGayton McKenze, ufote namalungu ekomiti eza kuququzelela itumente yehlabathi yeqakamba yangonyaka ka2027.
Image: GCIS
OwayenguMphathiswa weZimali, uTrevor Manuel, unikwe uxanduva lokukhokela ikomiti eza kuququzelela itumente yehlabathi yeqakamba eza kusingathwa nguMzantsi Afrika ngonyaka ka2027.
Isibhengezo senziwe nguMphathiswa weZemidlalo, uGayton McKenzie, entlanganisweni ebibanjelwe eGoli izolo. Kuthiwe ikomiti eququzelela itumente yehlabathi iza kusebenza ngokukhululekileyo ngaphandle kolawulo lukamphathiswa.
Abanye abantu abachongiweyo baquka uJohannes Adams, uYunus Bobat, uHerman Bosman, uVuyani Jarana, uNomfanelo Magwentshu, uRavi Naidoo noDr Phumzile Mlambo-Ngcuka. Abantu abonyuliweyo ngabantu abahloniphekileyo eMzantsi Afrika kumacandelo aquka elezoshishino, elomthetho njalo njalo.
UMzantsi Afrika uza kusingatha imidlalo yeqakamba yamazwe ehlabathi ngokubambisana namazwe aquka iNamibia neZimbabwe. Apha eMzantsi Afrika, imidlalo iza kudlalela eMonti, eGqeberha, eGoli, ePaarl, eKapa, ePitoli naseBloemfontein.
USihlalo weCricket South Africa, uPearl Maphoshe, uthe ikomiti enikwe umsebenzi iqala umsebenzi obalulekileyo ngoba itumente yeye'Afrika yonke. UManuel ucale oogxa bakhe ukuba benze itumente ezayo ibe yinto eyakuhlala ezingqondweni zabantu ixesha elide.
"Umsebenzi wethu uza kuphumelela ukuba sisebenzisana nazo zonke izintlu zikaRhulumente. Kubalulekile ukufaka emsebenzini wethu isebe leZothutho ngoba asifuni ifike itumente yehlabathi izikhululo zeenqwelomoya zingasebenzi kakuhle ngoba siza kube sineendwendwe," utshilo uManuel.
"Sifuna amapolisa aqinise ukhuseleko ngoba impatho entle yeyona engasoze ilatyalwe ngabatyeleli," utshulo uManuel onguSihlalo wekomiti. Emva kokubhengeza ikomiti eza kwenza umsebenzi, uMcKenzie uthe uMzantsi Afrika uyaziwa jiekelele ngokusingatha iitumente ezinkulu.
"Sasikhe sasingatha iFifa World Cup - kodwa zakusoloko zikhona izinto ezifuna ukulungiswa phaya naphaya. Nayo iMelika eza kusingatha itumente yehlabathi inezinto ezilungisayo," utshilo uMckenzie. Wongeze ngelithi urhulumente wobubambano unoxanduva lokuzisa iitumente ezinkulu futhi uMzantsi Afrika kufuneka uphumelele.