Sinxanelwe eny'impumelelo iSpringbok Women kwitumente yehlabathi

UMzantsi Afrika uya emdlalweni olandelayo unamandla emva kokuphumelela kakuhle owokuqala. Oku kulandela emva kokuba iSpringbok Women siyibethele oogqirha nezicaka iBrazil ngo'66-6 emdlalweni weRugby World Cup kwimpelaveki egqithileyo eNorthampton.

Impumelelo ithathe iintokazi zoMzantsi Afrika yazibeka phezulu kuGroup D. USwys de Bruin uvakalise uvuyo olukhulu emva komdlalo watsho encoma umsebenzi omhle owenziwe ngabadlali bakhe kwitumente yehlabathi abazimisele ukwenza bhetele kuyo.

Kwelinye icala, iFrance izibethele i-Italy ngo'24-0 emdlalweni wokuqala kaGroup D. Okwenzeke emdlalweni wokuqala kuchazwe njengesiseko esihle ngumqeqeshi weSpringbok Women, uSwys de Bruin. Iqela lakhe lilele kalishumi emgceni – logama iFrance ingakwazanga nakanye kowayo umdlalo.

UMzantsi Afrika ugxeleshe ukubetha i-Italy emdlalweni wesibini ngeCawe. "Iingqondo zethu kufuneka sizibeke kwi-Italy ngoku. Ndivuyisana nabadlali ngoba siyiqale kakuhle itumente yehlabathi," utshilo umqeqeshi emva komdlalo.

"Size emdlalweni wokuqala sinesicwangciso sokubeka isiseko esomeleleyo emdlalweni wokuqala. Ndonwabile ngoba siyenzile lo nto futhi namalalela wethu angene adlala ngendlela encomekayo kakhulu. Okwenza soneliseke kakhulu yindlela esidlale ngayo kukuba iBrazil ayikwazanga ukulala emgceni.

"Akukho gxeke emsebenzini owenziwe ngabadlali nakancinci. Kodwa sisenoxanduva lokudlalela ukufumana amanqaku kwakhona emdlalweni olandelayo," utshilo uDe Bruin echwayitile. UKapteni weqela, uNolusindiso Booi, uwuqhwabele izandla umsebenzi ococekileyo owenziwe ngoogxa bakhe.

"Sidlale kakuhle kakhulu. Besikhe sagqwidiza kancinci kwisigaba sokuqala – kodwa saphinda sakwazi ukwenza izilungiso. Ukuphumelela umdlalo ngale ndlela kwitumente yehlabathi kundenza ndiziqhenye njengoKapteni.

"Ayizukusiphazamisa into yokubetha iBrazil esedyongo embhoxweni ngoba iyaqala ukudlala kwitumente yehlabathi. Kubalulekile ukulungiselela ukudibana neItaly sikwisimo esilungele umdlalo," utshilo uBooi.