UYonela Ntsepo unomnqweno wokuvuthela impempe kwinqanaba eliphezulu!
UYonela Ntsepo, owaqala wangumdlali webhola ekhatywayo, ngoku ulola isakhono sakhe sokulawula imidlalo njengosompempe.
Image: Uthunyelwe
Njengokuba ibhola ekhatywayo yayisaziwa njengento yamadoda kuphela, yatshintsha lo nto eMzantsi Afrika ukusukela ngo1994. Kule mihla, maninzi amanenekazi azibalulayo ebholeni ekhatywayo aquka uAkhona Makalima olityhutyha lonke ihlabathi evuthela impempe emidlalweni yeCAF neFifa.
Omnye onomnqweno wokucangcatha emzileni wakhe nguYonela Ntsepo ongusompempe osalola isakhono sakhe sokuphatha imidlalo kwinqanaba elisezantsi. Le nzwakazi yaseSajonisi yaqala yangumdlali webhola ekhatywayo isencinane ezilalini phambi kokudlalela iWalter Sisulu University.
UNtsepo, 29, owayeyifolisi ngethuba esengumdlali, waziqaqambisa kwiJubase Youth Academy yaseMthatha ekwinqanaba elisezantsi. Ngenxa yokukhula nokuthanda ibhola, uYonela uyeke sele engunozinti.
"Ndakonwabela ukuba ngumdlali webhola ekhatywayo. Ebaleni ndandingumntu ozimiselayo kakhulu futhi odlala iindawo ezininzi," utshilo uNtsepo phambi kokucacisa ukuba kutheni ekuhambeni kwexesha egqibe kwelokuba abe ngusompempe.
Ngowona msebenzi onzima kumanenekazi ngoba kubakhona amaxesha okudelelwa ngamadoda. Ukuphatha imidlalo nokuvuthela impempe kufana nokuzalisekiswa kwephupha kuYonela welali ekuthiwa yiMajola ngoba yinto akhule efuna ukuyenza noxa ebenqabile amathuba.
"Ndandisoloko ndikunqwenela ukuba ngusompempe ndisakhula," utshilo uYonela ngokuzithemba ephendula umbuzo weli phephandaba. "Enyanisweni ndandifuna ukuba ngusompempe kuba enqabile amanenekazi aphatha imidlalo ebholeni ekhatywayo. Ndisakufuna ukuba ngusompempe okanye umncedisi kwinqanaba eliphezulu.
"Basothuka abanye abantu xa usompempe eyintombazana. Abanye basigibisela ngamazwi amabi – kodwa nangona kunjalo, ndiyayifumana inkxaso kakhulu ekuhlaleni, ekhaya, kubahlobo nakwiSafa ekummandla weO.R.Tambo District.
"Ndinqwenela ukuzibona ndithatha inxaxheba emidlalweni yeHollywoodbets, iMotsepe League nakweyePSL ngenye imini. Imibono yam ndingusompempe emidlalweni ephuma kumabonakude nakoonomathotholo yeyona endikhuthazayo yonke imihla ebomini bam," uvale ngaloo mazwi uNtsepo.