iSundowns iza kukhuphela umsindo wayo kwiChiefs emdlalweni weBetway Premiership
URonwen Williams uthi iMamelodi Sundowns iyiphose kwelokulibala eyomdlalo ogqithileyo phambi komdlalo wanamhlanje.
Image: Itumeleng English Independent Media
Emva kokuphoxeka kwimpelaveki egqithileyo, iMamelodi Sundowns iza kuzama ukukhuphela umsindo wayo kwiKaizer Chiefs. Oku kungenzeka xa iSundowns indwendwela iChiefs emdlalweni weBetway Premiership oza kube useFNB Stadium ngentsimbi yesixhenxe namhlanje ngorhatya.
Isophisa iSundowns emva kokuhluthwa intlaka emlonyeni yi'Orlando Pirates eyikhuphe kwiMTN8 Cup. Umdlalo uphele ingu'1-1 kodwa iPirates idlulele phambili emva kokuphumelela ngo'4-1 kwiipenela eLucas Moripe Stadium. Abalandeli beSundowns bakhuphele umsindo wabo ebadlalini emva komdlalo ogqithileyo.
Bavalele ibhasi kwaze kwangenelela amapolisa. URonwen Williams ukugxininisile ukubaluleka kokuyiphosa ngasemva into eyenzeke emdlalweni ogqithileyo phambi kokujongana neChiefs. Amasandawana asendaweni entle kwiBetway Premiership emva kokubetha AmaZulu neMagesi FC emidlalweni egqithileyo.
Uvumile kodwa uWilliams ukuba kukho ukudana okukhoyo enkampini yeSundowns emva kokubethwa kwayo. "Yah, asonwabanga emva kokungaqhubi kakuhle emdlalweni odlulileyo. Injongo yethu ibikukuya phambili kwiMTN8 - kodwa lo nto ayenzekanga. Kufuneka sizivuthulule siye phambili," utshilo uWilliams phambi komdlalo wanamhlanje.
Abadlali abafuna ukuhamba yenye yezinto ezithe zayiphazamisa ekuqaleni kwesizini entsha. "Akukuhlanga enkampini - kodwa sithethile ngezinto ezidla umzi entlanganisweni. Okubalulekileyo ngoku kukuya phambili njengokuba sidibana neChiefs. Sithe masilibale ngezidlulileyo izinto sibeke iingqondo zethu emdlalweni esijongene nawo," utshilo uWilliams.