Kugqugqise iDuncan Village kwitumente yamanqindi ebibanjelwe eMonti
Iimbethimanqindi zaseDuncan Village zenze ezibukwayo kwitumente yamanqindi ebibanjelwe eMonti kwimpelaveki egqithileyo.
Image: Boxing SA
Sibuyile isidima sikaNhlanhla Tyirha emva kokuphumelela ngempelaveki egqithileyo. Oku kwenzeke emva kokubethe uSunday Kiwali waseTanzania emlweni ophambili wetumente yamanqindi ebibanjelwe eOrient Theatre, eMonti, ngeCawe edlulileyo.
Ukuphumelela kwakhe uTyirha yinto enkulu ngoba ebebuye intliziyo yonakele emva kokubethwa nguBeaven Sibanda emdlalweni obuseKapa kwiinyanga ezidlulileyo kulo nyaka. Umlo ubunzima ngoba uTyirha uphumelele ngamanqaku emva kwemijikelo elishumi yonke.
Le ndedeba yaseMdantsane iphumelele imidlalo elishumi elinanye yabethwa kwemithathu kwinqanaba eliphezulu lamanqindi. Yena uNqaba Dantile waseKapa ubuyele ekhaya evuya emva kokuguqisa phantsi uAvuyile Soga waseDuncan Village obenethemba leziphumo ezihle.
Emlweni obubekelwe imijikelo emithandathu, uSoga woyisakele kumjikelo wesibini. UYanga Sigqibo waseDuncan Village ubethe uMsabaha Salum waseTanzania emlweni weInternational Junior Bantamweight. USalum ubekwe phantsi kumjikelo wesithandathu.
Komnye umlo, uSihle Booi waseDuncan Village ubethe uThimna Nteta waseKomani kumjikelo wesibini kwaphela ngaye emlweni weFeatherweight. Yena uSiyagcoba Veshiwe wenze umtsi oya phambili ekhondweni lakhe ngokubetha uManana Ibanathi emlweni weLightweight.
URandari Ogutu waseMdantsane ubethe uAbongile Maxazana waseDuncan Village. Emlweni weJunior Lightweight ogabule izigcawu kwitumente ebiseMonti, uAthobile Ngaliphi waseDuncan Village ubethe uSivenathi Qwemeshe waseDimbaza ngamanqaku.