Brutten 10: iWSU All Blacks neRising Stars zithi 'igwala kulonina'!
Amaqela ombhoxo alishumi aza kukhuphisana kwitumente ephantsi kweBorder Rugby Union ukusukela ngempelaveki.
Image: Pedro Mapelo/I'solezwe lesiXhosa
Ayifikanga igalelekile isizini yesibini yetumente yombhoxo ekuthiwa yiBrutten 10. Isiqendu esesibini siphehlelelwe ngoMvulo wale veki emsithweni obubanjelwe eBuffalo Club, eMonti. Ngamaqela alishumi ombhoxo aza kuthathana iiveki ezingaphaya kweshumi kule tumente ephantsi kweBorder Rugby Union.
Emva kwesizini yokuqala ehambe ngendlela encomekayo kunyaka ophelileyo, amaqela akwazileyo ukungena kulo nyaka aza kulwela indebe yesiliva ekhatshwa yimali engamawaka akumashumi amathathu eerandi (R30 000).
Kunyaka wokuqala weBrutten, kwaye kwaphumelela iFort Hare University eyaguqisa phantsi iSwallows emdlalweni wokugqibela. Ngelishwa lawo loo maqela, akakwazanga ukungena kwiBritten kule sizini.
Amaqela akhoyo ngumxube wamadala namatsha kraca aquka iBuffs, iWSU Eagles, iProgress, iFB United, iKomga United, iWSU All Blacks, iEC Police, iBerlin Tigers, iYoung Leopards neRising Stars. Ukungabikho kooxholovane ababini embhoxweni waseMpuma Koloni kunika iWSU All Blacks ithuba elihle lokugqugqisa kwisizini yalo unyaka.
Ngokutsho kukaKapteni, uAna Solani, iWSU All Blacks iza kuzama ukwenza ngcono kule sizini kunaleyo igqithileyo. "Kunyaka ophelileyo saxhaywa yiSwallows ukuze singafiki emdlalweni wokugqibela. Salwela saze sabamba indawo yesithathu," utshilo uSolani ezithembile.
"Itumente egqithileyo ibisemgangathweni ophezulu. Sinethemba lokuqhuba kakuhle kule sizini. Injongo yethu kukuphumelela indebe yeBrutten. Sithelekiswe namaqela ayingozi – kodwa ukuqhuba kakuhle kwethu kule sizini kuza kuncedisa amalungiselelo wethu weVarsity Shield," utshilo uSolani.
Ibethe ngenqindi phantsi iRising Stars ngelithi iza kwenza izinto zibonwe ngamehlo nokuba isafika kwiBrutten. "Akulophutha ubukho beRising Stars apha. Kudala sizilungiselela ngoba sazixelela unyaka usaqala. Imidlalo elishumi elinanye yesizini siyidlale sayiphumelela yonke.
"Silapha kule tumente kuba sifuna ukuzibonakalisa. Siliqela elizithembileyo futhi elizimiseleyo. Asoyiki, ikhona into eza kwenzeka nokuba yintoni na. Sithelekiswe namaqela omeleleyo – kodwa siza kuzama," utshilo uAsenathi Xaluva.