Amakhosi aqwalasela ukubolekisa ngabadlali abaliqela phambi kweveki ezayo
UNasreddine Nabi uza kubolekisa ngabo abanye abadlali beKaizer Chiefs ingaphelanga le nyanga.
Image: KC/WhatsApp
UNasredine Nabi nabaphathi bakhe bakhangela indlela yokucutha inani labadlali kwiKaizer Chiefs. Oku kuqinisekiswe ngumqeqeshi ngethuba ethetha neenthatheli eNaturena ekuqaleni kwale veki.
Amakhosi atyikitye ishumi elinanye labadlali kule sizini entsha - ngoku acinga ukubolekisa ngabanye abadlali ukuze bafumane amathuba okudlala kwamanye amaqela. Kutshanje Amakhosi amkele uKhanyisa Mayo, uLuke Baartman, Asanele Velebhayi, uSiphesihle Ndlovu, uNkanyisa Shinga, Ethan Chislett, uFlavio Silva, uPaseka Mako noThabiso Monyane ongumdlali waBafana Bafana.
Ekupheleni kwesizini ka2024/25, uNabi wacela ukufunelwa abadlali abasemgangathweni emva kokugweba indlala yeminyaka elishumi ngokuphumelela iNedbank Cup. Kukhangeleka ngathi wonelisekile linani analo ngoku njeengokuba ekhangela indlela yokuchitha abanye abadlali.
Uninzi ekuza kubolekiswa ngalo kungenzeka ibe ngabadlali abasuka kwiChiefs Academy abangadlalanga kakuhle kwisizini egqithileyo. Phakathi kwabadlali abatsha abangekadlali kukho uLebo Maboe no-Ighodaro oyifolosi.
"Sinabadlali abafikayo - kodwa abangakulungelanga ncam ukudlala ngenxa yezizathu ezingafaniyo. Kubalulekile ukuphatha indlela yabo ngobunono. Yena u-Ighodaro ukwazile ukuzilungiselela phambi kwesizini - kodwa uye wonzakala.
"Naye uMaboe wenziwe utyando kwiiveki ezidlulileyo. Kufuneka sibangenise ngobulumko eqeleni," utshilo uNabi phambi kokuthetha ngabadlali afuna bakhangelelwe amanye amaqela. Uthe ufuna inani labadlali elincinane kunabasondele kumashumi amane anabo ngoku enkampini.
"Ewe, iqela esinalo likhulu kakhulu. UKaizer Jr nabaqeqeshi bakhangela indlela abanokusiwa ngayo kwamanye amaqela ukuze bakwazi ukufumana amathuba okudlala. Abanye abadlali bethu abasakhulayo badinga amava kwiPSL futhi wonke umntu uyayazi into eza kwenzeka," utshilo uNabi phambi komdlalo weChiefs neSekhukhune United.
Emva kokuphoswa yiTop-8 iminyaka emibini, iChiefs ikhangela indlela yokugcina indawo yayo ephezulu kwiBetway Premiership emva kokuba iphumelele imidlalo emine kwemihlanu.