IKaizer Chiefs ibambene neMarumo Gallants ebinamandla eFNB Stadium
Amakhosi alahle amanqaku kwakhona emdlalweni abambene kuwo neMarumo Gallants edlale bhetele eFNB Stadium.
Image: Kaizer Chiefs/Facebook
Ilahle amanqaku kwakhona iKaizer Chiefs. Oku kwenzeke emva kokuba ibambene ngegowuli elinye neMarumo Gallants emdlalweni weBetway Premiership obubanjelwe eFNB Stadium namhlanje ngorhatya.
Kuyiwe kwixesha lokuphumla iChiefs ihamba phambili ngegowuli emva kwesiqalo esihle kwisiqingatha sokuqala. Igowuli leChiefs lifakwe nguKhanyisa Mayo emva kokudlalelwa nguAshley Du Preez. UMayo ukudlalela iChiefs namhlanje ukusukela oko efike eMzantsi Afrika ngemboleko esuka kwiqela laseAlgeria.
Amakhosi adlale ngcono kwisigaba sokuqala nangona ibiyiMarumo Gallants ebibonakalisa ukuzithemba ebaleni. Ziguqukile izinto kwisigaba sesibini, iMarumo Gallants iwuthathele kuyo umdlalo ngokupheleleyo.
Abadlali beChiefs bebengakwazi ukudibanisa iibhola baye phambili bengayilahlanga. UMayo noGaston Sirino bakhutshwe kwangoko kwisigaba sesibini yatsho yaganya iMarumo Gallants emva.
UJaisen Clifford ufake igowuli lokulinganisa emdlalweni ophele amaqela entanganye. Amakhosi aza kuzikhalela ngoba ebekhe ayifumana nepenela ekhatywe nguSirino yacikwa nguWashington Arubi. Amakhosi akakwazanga ukuphumelela imidlalo emithathu ilandelelana.