IRichards Bay ingcwabe iChippa United emdlalweni weCarling Cup
IRichards Bay iya phambili emva kokuba izibethele iChippa United emdlalweni weCarling Knockout Cup namhlanje.
Image: Facebook
Idlulele phambili kwiCarling Knockout Cup namhlanje iRichards Bay emva kokuba ingcwabe iChippa United ngamagowuli amane kwelinye eRichards Bay Stadium. Kuyiwe kwixesha lokuphumla iRichards Bay iphala phambili ngamagowuli amathathu kwelinye.
UNtlonelo Bomelo ubhakuzelise umnatha emzuzwini wesine kuqala umdlalo. Kudlule imizuzu nje emithathu, uKnox Mutizwa wafaka igowuli yatsho yakhokela ngamagowuli amabini iRichards Bay phambi kwabalandeli bayo. Uye waphendula uAzola Tshobeni emzuzwini wamashumi amabini anesihlanu. Ligowuli eliyinike ithemba iChippa egqagqaniselwe kwangoko liqela laKwaZulu-Natal.
Emzuzwini wamashumi amathathu anesixhenxe ufake igowuli lakhe lesibini. Kuthe xa kuphela ixesha lomdlalo, uLundi Mahala ubethelele isikhonkwane sebhokisi ekungcwatywe ngayo iChippa United ekhutshiweyo ngoku kwiCarling Cup.
Amanye amaqela aphumeleleyo aquka iPirates ebethe iSiwelele FC ngo'1-0 izolo. Yona iGolden Arrows izingombele iSekhukhune United ngo'3-1 komnye umdlalo. IMarumi Gallants yothuse umzi ngokukhupha iMamelodi Sundowns kwiipenela ebusuku izolo.