Umqeqeshi wePirates uzingomba isifuba ngabadlali bakhe
uAbdeslam Ouaddou ubaqhwabele izandla abadlali bakhe emva kokuba i'Orlando Pirates ibethe iSiwelele FC emdlalweni weCarling Cup.
Image: Independent Media
Uncume olukabhulankethe uAbdeslam Ouaddou emva kokuba i'Orlando Pirates izibekele indawo kumjikelo olandelayo weCarling Knockout Cup.
Oku ukuvakalise emva kokuba iPirates ibethe iMarumo Gallants ngegowuli elinye eqandeni emdlalweni otake iintlantsi eOrlando Stadium emalanga woMgqibelo odlulileyo. Iqhawe losuku ibenguMbekezeli Mbokazi ofake igowuli elihle ekude.
Udibene nebhola ebichithwe yiMarumo Gallants phakathi ebaleni, uye wayiqhuba kancinci emva koko wakhaba imbumbulu yebhola. Unozinti weMarumo Gallants uve ngentswahla yabalandeli bePirates wavuya uMbokazi obeqala ukufumana igowuli.
Iziphumo zomdlalo zamkelwe ngovuyo ngumqeqeshi ngoba iPirates yakhutshwa kumjikelo wokuqala kwisizini egqithileyo. Okwenze wavuya ngakumbi umqeqeshi kukuba iPirates iphumelele imidlalo esibhozo ngoku ilandelelana ngaphandle kokufakwa kwamagowuli kuyo.
"Mandivuyisane nabadlali bam. Akululanga ukudlala neSiwelele FC ngoba ilushica," utshilo uAbdeslam echwayitile emva komdlalo. "Ndiyayazi imidlalo enje, inenkathazo ngoba iphunyelelwa ngezinto ezincinci. Siphumelele namhlanje ngegowuli elivele kumdlali wethu wasemva.
Uyandichulumancisa umsebenzi owenziwe ngabadlali ngoba usinika ithuba lokuya kumjikelo olandelayo. Ndiyaziqhenya ngomsebenzi wabadlali ngoba njengokuba sidlala oko, basinika iziphumo ezicocekileyo.
Kufuneka siqhubele phambili nokuvelisa iziphumo ezihle. Kumnandi ngoba siyakwazi ukufaka amagowuli futhi sidlala umdlalo omhle," utshilo umqeqeshi emva komdlalo.
Ezimnyama ziza kufumana ithuba lokubuyisa izitya kumjikelo olandelayo xa zidibana neMagesi FC eziintshatsheli ezikhuselayo zeCarling Knockout Cup zonyaka ophelileyo.