UCardoso uyiqhwabele izandla iSundowns ephumelele ngo'5-1

Ibuyele ekhaya idloba okwamathol' enkomo iMamelodi Sundowns emva kokwenza umsebenzi omhle. Amasandawana avuthulule iRemo Stars ngemvula yamagowuli amahlanu kwelinye emdlalweni weCAF Champions League obubanjelwe eM.K.O. Abiola International Stadium, eKuto, eNigeria, emalanga ngeCawa edlulileyo.

Iintshatsheli zeBetway Premiership zikhawulezise zayinqwamza iRemo Stars emdlalweni ozithathe wazisondeza kwisigaba esilandelayo seCAF Champions League noxa kuseza kudlalwa omnye umdlalo. Isigaba sokuqala sihambe kakuhle ngoba iSundowns ikwazile ukufumana amagowuli ebingaphumelela ngawo umdlalo.

Emzuzwini weshumi elinambini, uTashreeq Matthews ubhakuzelise umnatha emva koko kwalandela igowuli lesibini elifakwe nguPeter Shalulile obefumene ithamsanqa lokuqala umdlalo eNigeria.

Kwisigaba sesibini, iRemo Stars ifumene igowuli eliyinike ithemba elikhawuleze laphelela emoyeni emva kwamagowuli nguArthur Sales, uTsiki Ntsabeleng noMiguel Reisinho.

Ngamagowuli aphantsi aqinisekise ukudlulela kweSundowns kumjikelo olandelayo ngoba iRemo Stars ayinawo amathuba okufumana amagowuli asixhenxe emdlalweni olandelayo eMzantsi Afrika. Noxa iSundowns ibidibene nefokofoko - kodwa uMiguel Cardoso uyincomile indlela ewenze ngayo umsebenzi.

"Into endiyithandileyo kukwenziwa komsebenzi kakuhle. Ndibalumkisile abadlali ngokudelela amaqela amancinci," utshilo uCardoso echwayitile emva komdlalo. Uvumile ukuba bekunzima ukulungiselela ukudibana neqela elingaziwayo ncam.

Amasandawa aza kulibala ngokwenzeke eNigeria alungiselele umdlalo wesibini oza kube ungoLwesihlanu. "Akukho nto endiza kuyithetha emva komdlalo wokuqala noxa siphumelele kakuhle. Kubalulekile ukulihlonipha iqela esidlale nalo.

"Sisenomsebenzi ofuna ukwenziwa phambi kwethu. IRemo Stars liqela eliziintshatsheli eNigeria. Siqhube kakuhle emdlalweni ngoba sikwazile ukufumana izithuba emdlalweni wayo," utshilo umqeqeshi weSundowns eqinisekileyo ukuba iza kudlulela phambili.