Asina ededelana amaqela akhuphisana kwiBrutten engena kuvuthondaba!
Amaqela ombhoxo athatha inxaxheba kwiBrutten 10 aza kuswantsulisana emidlalweni eza kubanjelwa ePolice Park Stadium, eMonti, ngoMgqibelo.
Image: Pedro Mapelo/I'solezwe lesiXhosa
Ongayilandeli imidlalo yeBrutten uyaphoswa ngumbhoxo osemgangathweni ophezulu. Iziphumo zemidlalo eqhubeke kwiiveki ezine ezigqithileyo zikubhence ngokupheleleyo ukuzimisela kwayo amaqela alishumi athathe inxaxheba kwisizini yesibini yeBrutten 10.
Ngelishwa, njengokuba itumente ingena kuvuthondaba, kukho amaqela ekufuneka ashiyeke ngasemva emva kokungakwazi ukuqokelela amanqaku oneleyo. Lo nto iqale kwiveki ephelileyo ngokuphuma kweWSU Eagles neRising Stars etsale umdla wabantu abaninzi ngenxa yokudlala kwayo umbhoxo omhle.
Ngentsasa yangoMgqibela, imidlalo iza kubuyela ePolice Park Stadium, eMonti, emva kweeveki ezimbini eMdantsane. Umdlalo oza kugabula izigcawu uza kube uphakathi kwayo iEC Police neBerlin Tigers. Omabini la maqela akaqhubanga kakuhle kule sizini.
AmaPolisa aya emdlalweni olandelayo eqhwaela emva kokubethwa yiWSU All Blacks. Kumaqela aza kukhiqwa, iBerlin Tigers yenye yawo ngoba khange iphumelele namnye kwemithathu eyidlalileyo. AmaPolisa neBerlin ngawona maqela ajingelwa lizembe kule veki.
Umdlalo oza kutsala umdla wabalandeli bombhoxo ngophakathi kweWSU All Blacks neYoung Leopards ngentsimbi yeshumi elinambini emini emaqanda. Omabini amaqela akhuthazekile emva kokuphumelela yonke imidlalo kule sizini.
Njengokuba abaninzi bebona iWSU All Blacks njengeqela eliza kutshatshela, umdlalo ongempelaveki ubalulekile ngoba iza kuvavanywa yiYoung Leopards eqhuba kakuhle. Kwelinye icala iBuffs, eqhothoza kakuhle nakubeni iqala kwiBrutten, iza kujongisa iintolo zayo kwiProgress efokofoko.
Omnye umdlalo oza kutaka iintlantsi ngophakathi kweFB United neKomga United. Umoya uphezulu enkampini yeKomga emva kokubetha iWSU Eagles emdlalweni obuseSisa Dukashe Stadium kwiveki ephelileyo. Izibonakalisile iFB United ukuba iyingozi kule sizini.
Emidlalweni emithathu, iphumelele yonke yatsho yathi ngcu kwindawo yokuqala ngeshumi elinane lamanqaku. Lo nto icacisa mhlophe ukuba umdlalo ozayo uza kudibanisa amaqela ombhoxo azimiseleyo kakhulu.