Amanenekazi oMzantsi Afrika azenzele imbali kwiqakamba yehlabathi
Iqela lesizwe loMzantsi Afrika lamanenekazi liza kudlala umdlalo wokugqibela weCricket World Cup emva kokubetha iNgilane izolo.
Image: X / PROTEAS WOMEN
UMzantsi Afrika unyukela kwindawo ephezulu kwicandelo lezemidlalo kwihlabathi. Njengokuba ibingaMabhokobhoko amela ilizwe kwiitumente zehlabathi, ngoku ibhola ekhatywayo neqakamba zizeke emzekweni.
Kwiiveki ezidlulileyo, aBafana Bafana bazibekele indawo kwiFIFA World Cup eza kube ikunyaka ozayo. Kule veki, amanenekazi oMzantsi Afrika abhale iincwadi zembali ngokutsha kwiqakamba ngokufikelela kwisigaba sokugqibela setumente yehlabathi (T20 World Cup).
Oku kwenzeke emva kokuba uMzantsi Afrika ibethe iNgilane ngekhulu elinamashumi amabini anesihlanu (125) izolo. Kumangeno eMzantsi Afrika wenze amakhulu amathathu aneshumi elinethoba lemitsi (319) kuwe oothinti abasixhenxe (7).
Yona iNgilane yenze ikhulu elinamashumi alithoba anesine (194). Omnye wabadlali abathe benza indima ephambili nguKapteni woMzantsi Afrika, uLaura Wolvaardt. Emsebenzi owenziwe ziintokazi zeli lizwe, yena yedwa ufumene ikhulu elinamashumi amathandathu anethoba (169).
Omnye umdlali owenze umsebenzi oncomekayo nguMarizanne Kapp odilize iqela lamaNgesi ngowisa oothinti abahlanu bonke. "Impumelelo esiyifumeneyo ikhethekile. Wonke umntu uchwayitile emva kokuxhaywa yiNgilane kwiinzame zethu kwiitumente ezingaphambili," utshilo uWolvaardt emva komdlalo onwabilee.
"Kuyasivuyisa ukwenza imbali. Namhlanje sidlale iqakamba esemgangathweni ophezulu. Ndizingomba isifuba ngomsebenzi owenziwe liqela lethu," utshilo uWolvaardt ofince amawaka amahlanu emitsi kwimidlalo yosuku.