Ityala likaMalema lihlehliselwe isigwebo kweyoMsintsi
Inkokeli yeEFF uJulius Malema kunye nowayesakuba ngunogada wakhe uAdriaan Snyman ngethuba bebevele kwinkundla kamantyi eMonti.
Image: EFF/X (@EFFSouthAfrica)
Inkokeli yeEconomic Freedom Fighters (EFF), uJulius Malema, uvele kwinkundla kamantyi waseMonti ngale ntsasa kunye nowayesakuba ngunogada wakhe uAdriaan Snyman, beyoxoxa ityala labo abatyholwa ngokudubula umpu esidlangalaleni ngo2018, nalapho lithe lahlehliselwa umhla wama29 kweyoMsintsi 2025.
NgoMvulo inkundla imamele iingxoxo zokuvala ezimalunga nezityholo zokudutyulwa kompu kumsitho wokubhiyozela iminyaka emihlanu yeEFF eSisa Dukashe Stadium, eMdantsane, eMonti, ngo2018.
Igqwetha likaMalema, uAdvocate Shane Matthews, uthe abukho ubungqina bobunyani bevidiyo ejikelezayo engqina ityala lombuso.
"Ubunyani bevidiyo ejikelezayo kunye nokuchongwa kompu ekutyholwa ukuba udutyulwe abuxhaswa nabuphi na ubungqina, obunokukhokelela kwinkundla efanelekileyo ukuba igwebe ummangalelwa," uMatthews uxelele inkundla eMonti.
UMatthews ukwathe le khatriji yompu ayifani naleyo kuthiwa yadutyulwa eqongeni ngethuba kubhiyozelwa iminyaka emihlanu yeEFF eMdantsane.
Uthe akukho mntu uye wasabela ngoloyiko ngenxa yendlela aziphethe ngayo umtyholwa eqongeni ebaleni ngexesha lemibhiyozo. "Akukho namnye kumalungu amahlanu eNkonzo yaMapolisa oMzantsi Afrika ebeseqongeni ebaleni ngexesha lombhiyozo obone nantoni na engalunganga kwicala lomtyholwa ngexesha lomsitho," utshilo.
Eli tyala nebeliqhuba iminyaka liza kuwisa isigwebo ngomhla wama29 kweyoMsintsi 2025.