Kudutyulwe kwabulawa ababini, konzakala omnye Kwazakhele

Amapolisa aseGqeberha aphanda ityala lokubulala apho indoda (29) kunye nodade wabo omncinci (13) badutyulwe babhubha, logama umninawa (9) yena wonzakele Kwazakhele.

Esi sehlo senzeke ngoLwesihlanu umhla we18 kweyeKhala kwaye igqiza labacuphi beNelson Mandela Metro Detective Intervention Task Team eGqeberha bacela nabani na onokuthi anike iinkcukacha ezingakhokelela ekubanjweni kwabenzi bobubi.

Isithethi samapolisa uKapteni Sandra Janse Van Rensburg uthi malunga nentsimbi ye15:10, umfi (29), ufike ekhaya kwisitalato iSidindi, Kwazakhele emva kokuyothenga evenkileni nesithandwa sakhe, intombi yesithandwa sakhe, udade wabo (13) kunye nomninawa (9).

"Uthe xa esothula isithandwa sakhe kunye nentombi yesithandwa sakhe (12), nabangena endlini kwaye emva koko isithandwa seva ngezithonga zompu ezininzi. Ingqina liqaphele malunga nabarhanelwa abathandathu ababedubula kaninzi kwisithuthi kwaye babaleka kwindawo yexhwayelo emva koko," utshilo uJanse Van Rensburg.

Ingxelo yamapolisa ithi umfi (29) ebekwisitulo somqhubi wemoto yakhe iVW Polo esiliva, intwazana (13) ibikwisitulo esingasemva kwaye babhubhele kwindawo yexhwayelo ngelixa inkwenkwana (9) yonzakele emilenzeni yomibini yaze yasiwa esibhedlele ukuze ifumane unyango.

Unobangela kunye nabarhanelwa azikaziwa, kwaye uphando lusaqhuba. Amagama ababhubhileyo aza kukhutshwa xa izalamane zazisiwe.

"Nabani na onolwazi olunokunceda amapolisa ukusombulula olu phando angatsalela umcuphi uWarrant Officer Leslie Kilian ku082 410 7492 okanye iCrime Stop ku08600 1011 okanye isikhululo samapolisa esikufutshane. Imiyalezo inokuthunyelwa ngeMySAPS App kwaye inokuthunyelwa ngaphandle kokuba abantu bazichaze ukuba bangoobani na. Zonke iinkcukacha ziyimfihlo, kwaye abafowunayo banokuhlala bengaziwa," utshilo uJanse Van Rensburg ebongoza uluntu.