Mbalula: 'UZuma akangoMesiya, ungumthengisi'

UNobhala Jikelele weANC uFikile Mbalula ugxeke uJacob Zuma esithi “umele yonke into engalunganga” watsho esithi “ungumthengisi” ngokuxhasa iMorocco kumba weWestern Sahara.

UMbalula wenze le ntetho ngeCawe ethetha ecaleni neentatheli ngethuba lendibano yeNational Working Committee eKapa, eNtshona Koloni. UMongameli weMK Party, uJacob Zuma, kutshanje utyelele uMphathiswa wezangaPhandle waseMorocco uNasser Bourita eRabat, eMorocco.

Kubekho imbambano malunga nommandla weWestern Sahara iminyaka emininzi phakathi kwabantu bomthonyama baseSaharawi abamelwe yiPolisario Front kunye norhulumente waseMorocco. 

"Ukuxhasa kweMorocco nguJacob Zuma ayothusi. UJacob Zuma umele yonke into engalunganga enziwa ngabathengisi. SiyiANC, siza kulwela ukuzimela kwabantu baseSaharawi, simanyene nabo. IMorocco kufuneka iyeke ukuyomisa iintente eWestern Sahara," utshilo uMbalula.

"UZuma akangoMesiya, ungumthengisi, isigqibo sakhe sokwenza yonke le nto ayisothusi. Njengesigqibo sakhe sokuba izinto zeANC aseke umbutho wezopolitiko awubize ngale nto uyiyo, ukohlula abantu bakuthi, nokwenza iANC ibe buthathaka ukuze kuxhamle isiqu sakhe yinto ebesoloko eyiyo," wongeze watsho.

Kutshanje iANC ikugxekile ukusetyenziswa kweflegi yoMzantsi Afrika kutyelelo lukaZuma. "IANC ibongoza iSebe lezoBudlelwane baMazwe ngaMazwe neNtsebenziswano (DIRCO) ukuba likhuphe ingxelo esesikweni lifuna ingcaciso ekhawulezileyo kunye nokuxolisa kwabasemagunyeni eMorocco.

"Sikwahlaba ikhwelo kubo bonke abemi boMzantsi Afrika, nokuba bakweyiphi na imibutho yezopolitiko, ukuba basikhabe esi senzo sisongela ulongamo lwethu, intando yethu yesininzi, kunye nomanyano lwethu lwesizwe," sitshilo isithethi seANC kuzwelonke uMahlengi Bhengu.