Ngamakhulu abahlali baseGqeberha abafumene iipasile zokutya neengubo
Abahlali baseGqeberha kwisikolo samabanga aphakamileyo iWalmer bafumene iipasile zokutya neengubo ngeMandela Day.
Image: Uthunyelwe
Ikhulu labahlali bebegcwele kwisikolo samabanga aphakamileyo iWalmer eGqeberha nalapho bebenikwe iipasile zokutya, iingubo, nokutya okuphekiweyo ukukhawulelana nabo kobu busika.
IEngen kunye neGift of the Givers batyelele isikolo samabanga aphakamileyo iWalmer ukuya kunikezela ngezi zinto ebantwini ngexesha lokubhiyozela uSuku lukaMandela ngoLwesihlanu, umhla we18 kweyeKhala.
UOlwethu Mdabula onguManejala weEngen weCSI uthe uSuku lukaMandela lubakhumbuza ngokuzinikezela kukaMadiba okungagungqiyo eluntwini kunye nenkolelo yakhe kumandla entshukumo ehlangeneyo ukuzisa utshintsho oluncomekayo.
IEngen neGift of the Givers baye basebenzisana ukuzisa uncumo eluntwini ngeMandela Day.
Image: Uthunyelwe
"Kulo nyaka, besifuna ukuphendula ngokubonakalayo kwintlekele ekhoyo – ukuzisa imfudumalo, ukutya, kunye nesidima kuluntu olutsala nzima ebusika. Intsebenziswano yethu ekudala ikho neGift of the Givers kunye neFoodForward SA iyaqhubeka nokuba luncedo ekwenzeni loo mpembelelo ibe yeyokwenene," utshilo uMdabula.
Umphathi weProjekthi yeGift of the Givers, uAli Sablay, uthe iEngen isoloko ikulungele ukunceda. "Ukusuka kwimpendulo engxamisekileyo ukuya kubonelelo lokutya oluzinzileyo, inkxaso yabo engaguqukiyo yenza ukuba sikwazi ukufikelela kwabo bafuna uncedo kakhulu. Siyazingca ngokuba nentsebenziswano neEngen kwakhona ngolu suku lukaMandela," utshilo uSablay.
Bathi uSuku lukaMandela ayilosuku nje lwesikhumbuzo – lixesha lokucingisisa nokwenza. Ingxelo ithi ihlaba ikhwelo kumntu wonke ukuba achithe imizuzu engama67 ubuncinci esenza into enceda abanye, isikhumbuzo seminyaka engama67 athe uNelson Mandela wazinikela ekulweleni ubulungisa.